Ambasada e Republikës Çeke në bashkëpunim me zyrën e BE-së në Kosovë do të bëjë hapjen e ekspozitës me fotografi “Kohërat po ndryshojnë” për të shënuar Ditën e Evropës.

Ekspozita është organizuar në dritën e ngjarjeve Havel@80 që mbahen në mbarë botën në shenjë të përkujtimit të trashëgimisë së Václav Havel-it dhe përvjetorit të 80-të të ditëlindjes së tij në vitin 2016.

Václav Havel, poeti i demokracisë së shekullit 20-të, u dha shpresë jo vetëm miliona njerëzve në Evropën Lindore, por edhe popujve në tërë botën të cilët besojnë se të drejtat e njeriut janë universale.

Popujve të cilët besojnë se mund dhe duhet të luftojnë për të drejtat e njeriut dhe të ndihmojnë njerëzit në komunitetin e tyre dhe globalisht.

Iniciativa Havel@80 prezanton Václav Havel-in për popujt në mbarë botën si një njeri të rëndomtë me ndikim të jashtëzakonshëm për jetërat tona.

Ekspozita me fotografi dokumentuese në bardh e zi prezenton Havelin për qytetarët e Kosovës si një disident, president dhe një qytetar, dhe ilustron momente të sinqerta nga jeta e tij jozyrtare dhe intime dhe prapa skenave derisa Haveli ishte president.

Fotografi Oldřich Škácha, i famshëm për fotografitë e tij bardh e zi të disidencës çeke dhe të Vaclav Havelit në veçanti, ka mbajtur marrëdhënie të afërta me Havelin prej vitit 1960 deri kah fundi i jetës së Havelit.

Ekspozita do të hapet në EUICC Prishtinë më 9 maj 2016 në ora 19:30 dhe mediat janë të mirëseardhura të marrin pjesë.

Ekspozita do të jetë e hapur për publikun e gjerë prej datës 11 deri 31 maj 2016 nga ora 9:00 – 18:00 në Qendrën Informative dhe Kulturore të BE-së në Prishtinë.