Në praninë e një numri shumë të madh artistësh, artdashësish, zyrtarëve të institucioneve shtetërore e studentëve, në ambientet e Kolegjit AAB, u inaugurua Teatri i Kolegjit AAB “Faruk Begolli”.

Me këtë rast, prerjen simbolike të shiritit të AAB Teatrit “Faruk Begolli”, e bënë kryetari i Bordit të Kolegjit AAB, aktori Ilir Tafa, motra e aktorit të ndjerë Faruk Begolli, Asliha Binishi dhe aktori Enver Petrovci.

Në këtë ceremoni solemne, drejtoresha e Teatrit të Kolegjit AAB “Faruk Begolli”, Burbuqe Berisha, tha se në kohën kur digjitalizimi na ka përfshirë të gjithëve dhe thellësisht jemi pjesë e telefonave dhe pajisjeve të mençura, një institucion si AAB ka vendosur që të sjellë në vatrën e vet një art të vjetër, e ai është teatri.

Ajo u shpreh shumë e lumtur për pjesëmarrjen e një numri kaq të madh, dashamirë të artit skenik dhe shpalosi planet se AAB Teatri “Faruk Begolli”, do të ketë një repertor të përhershëm në skenën e mbrëmjes, si dhe repertorin e veçantë për fëmijë.

Në emër të familjes së aktorit Faruk Begolli, i nipi i tij Gramos Begolli, ka shprehur falënderimet e familjes së tij për AAB-në, duke i uruar këtij teatri jetëgjatësi, siç tha ai,sa krejt trojet shqiptare.

Sipas një njoftimi të Kolegjit AAB, këtë ceremoni e bëri edhe më të veçantë edhe prezenca e ish bashkëshortes së aktorit të ndjerë Faruk Begolli, hungarezja Zoja Begolli, e cila vazhdon ta mbajë mbiemrin e tij, ndërsa u shpreh jashtëzakonisht e emocionuar për këtë ngjarje, duke theksuar se Faruk Begolli e ka merituar një nderim të këtillë.

Pas prerjes së shiritit u dha edhe premiera e shfaqjes “Profesor, jam talent…”, një shfaqje e punuar nga profesori Luan Daka, bashkë me ekipin e aktorëve, si: Fatlume Bunjaku, Vjosa Malokaj, Vjollca Hoti, Adelina Zekolli, Valmir Krasniqi, Laureta Gashi, Arta Lahu dhe Furtuna Aliu.

Teatri i AAB-së “Faruk Begolli” është teatri më modern në rajon, ndërsa do të funksionojë si institucion i pavarur profesionist i hapur për të gjithë shikuesit me repertorin e vet të rregullt, në skenën për të rritur dhe skenën për fëmijë. Ky teatër, i pajisur me teknologjinë përkatëse më të sofistikuar, ka kapacitet prej400 ulësesh, dhe krahas shfaqjeve teatrore, synon të shërbejë edhe për të gjitha veprimtaritë kulturore e artistike që do të zhvillohen jo vetëm në nivel vendi por edhe më gjerë.