I dërguari për Lindjen e Mesme i Presidentit të sapozgjedhur të Shteteve të Bashkuara të Amerikës, Donald Trump, Steve Witkoff, ka vizituar Arabinë Saudite dhe është takuar me princin e kurorës së atij vendi, Mohammed bin Salman.

Siç konfirmuan për Axios dy burime të njohura me këtë çështje, ishte takimi i parë midis Mohammed bin Salman dhe një anëtari të administratës së ardhshme Trump që nga zgjedhjet presidenciale të nëntorit që u mbajtën në SHBA.

Burimi tha se Witkoff dhe Mohammed bin Salman diskutuan të mërkurën marrëdhëniet SHBA-Saudite, luftën në Gaza, mundësinë e normalizimit të marrëdhënieve me Izraelin dhe çështje të tjera.

Në fillim të kësaj jave, Witkoff ishte në Emiratet e Bashkuara Arabe për një konferencë kripto, dhe gjatë një vizite në Abu Dhabi ai u takua me këshilltarin e sigurisë kombëtare të Emirateve, Sheikh Tahnun bin Zayed dhe diskutuan për luftën në Gaza, trazirat në Siri dhe çështjet të tjera rajonale.

Trump emëroi Witkoff-in, mikun e tij më të mirë dhe një nga të besuarit e tij më të ngushtë, si të dërguarin e administratës së tij në Lindjen e Mesme me qëllimin e shprehur për të përfunduar një marrëveshje gjithëpërfshirëse me Arabinë Saudite, një proces që filloi gjatë administrimit të presidentit aktual të SHBA-së, Joe Biden.

Presidenti i zgjedhur amerikan dëshiron që marrëveshja të përfshijë një marrëveshje historike paqeje midis Izraelit dhe Arabisë Saudite dhe çdo përparim drejt përfundimit të konfliktit izraelito-palestinez, thanë burime të njohura me qëllimet e Trump.

I dërguari i ri special i Trump për çështjet e pengjeve, Adam Beller, pritet të vizitojë Izraelin javën e ardhshme, e para që nga emërimi i tij, tha një zyrtar tjetër izraelit./abcnews.al