Veç për sot e nesër, KESCO importoi mbi 3.5 milionë euro rrymë – nga dhjetori për çdo ditë rreth 1.5 milion

16:52 | 13 Dhjetor 2024
R J

KESCO ka njoftuar se për sot dhe një pjesë të ditës së nesërme kanë importuar energji elektrike mbi 3.5 milionë euro. Sipas tyre kjo ka ndodhur për shkak të zvogëlimit të prodhimit “në mënyrë të papritur” nga prodhuesi vendor.

“Për shkak të zvogëlimit të prodhimit në mënyrë të papritur nga prodhuesi vendor në kohën kur kërkesa po shkon mbi 1100 MËh, vetëm për ditën e sotme dhe një pjesë për ditën e nesërme, kemi importuar energji elektrike mbi 3.5 milionë euro.”

Kompania për Furnizim me Energji Elektrike shton se në rrethanat kur kërkesa për konsum është më e lartë “këtë gep mes kërkesës dhe prodhimit vendor ne duhet ta importojmë për të siguruar furnizim për konsumatorët tanë”.

Kjo kompani thotë se që nga fillimi i këtij muaji, KESCO ka importuar mesatarisht 1.5 milionë euro për çdo ditë.

Në fund, KESCO ka bërë apel që të kursehet energjia elektrike.

Shpërndaje në rrjete sociale

Lajmet më të lexuara

Të ngjashme

Foto lajm