Asnjë parti politike në Kosovë nuk i është drejtuar Komisionin Qendror të Zgjedhjeve (KQZ) për certifikim, periudhë që u hap qysh më 1 shtator.

Kështu bëri të ditur për Arbresh.info zëdhënësi i KQZ-së, Valmir Elezi.

Atyre u kanë mbetur edhe 17 ditë kohë që t’i dorëzojnë pranë KQZ-së kërkesat e tyre për t`u certifikuar në këto zgjedhje.

“Deri më 11 dhjetor të këtij viti, subjektet politike (partitë politike, koalicionet, nismat qytetare dhe kandidatët e pavarur) duhet të dorëzojnë në Komisionin Qendror të Zgjedhjeve kërkesat e tyre për certifikim për pjesëmarrje në Zgjedhjet për Kuvendin e Kosovës që do të mbahen më 9 shkurt 2025. Gjithashtu, gjatë kësaj periudhe, subjektet politike duhet të dorëzojnë edhe listat e tyre me emrat të kandidatëve për deputetë. Kjo periudhë ka filluar më 1 shtator, por mund t’iu konfirmoj se deri më tani nuk kemi pranuar ndonjë aplikim nga ana e subjekteve politike.”, tha Elezi për Arbresh.info.

Elezi theksoi se Këshilli Gjyqësor i Kosovës është njëri prej institucioneve që KQZ-ja do të kërkojë verifikim të kandidatëve.

Kjo kërkesë do t’i shkojë këtij organi gjyqësor nga KQZ-ja, duke u bazuar në Ligjin për Zgjedhje.

“Në nenin 30 të Ligjit për Zgjedhje të Përgjithshme, theksohet se kandidat nuk mund të jetë një person nëse “është dënuar në 3 vjetët e fundit me vendim gjyqësor të formës së prerë për vepër penale, me një ose më shumë vjet burgim efektiv”. Prandaj, me qëllim të zbatimit të këtij përcaktimi ligjor, do të kërkojmë nga KGjK-ja që të verifikojë listën e kandidatëve nëse ndonjëri prej tyre nuk është në përputhje me këtë kufizim ligjor.”, tha mes të tjerash ai./Arbresh.info/