Policia arrestoi një 14-vjeçar, i cili akuzohet për vrasjen e bashkëmoshatarit të tij, ngjarje që ndodhi të hënën rreth 200 metra larg shkollës 9-vjeçare “Fan Noli” në Tiranë.

“Në vijim të veprimeve hetimore dhe procedurale të kryera në lidhje me ngjarjen e ndodhur ditën e djeshme, në rrugën “Qemal Stafa”, specialistët e Seksionit për Hetimin e Krimeve Ndaj Personit arrestuan një të mitur 14 vjeç, për veprat penale “Vrasja me dashje e kryer ndaj të miturit” dhe “Prodhimi, mbajtja, blerja apo shitja pa leje e armëve të ftohta”, parashikuar nga nenet 79 pika a dhe 279 të Kodit Penal”, njoftoi policia këtë të mërkurë.

Nga ngjarja që ndodhi pranë shkollës, u përfshinë në total tre persona. Autori 14-vjeçar gjatë sherrit me dy bashkëmoshatarë të tij i goditi me thikë. Për pasojë mbetën të tre të plagosur. Por një prej tyre ndërroi jetë në spital, ndërsa tjetri, bashkë me autorin, janë jashtë rrezikut për jetën.

Si ndodhi ngjarja?

Dyshimet janë që ata u takuan me qëllim sqarimin e një konflikti që kishin patur të premten e shkuar. Tre të rinjve iu bashkuan dhe katër adoleshentë të tjerë, po të së njëjtës moshë të cilët qenë prezent në momentin e ngjarjes.

Ndonëse takimi ishte për sqarim, gjithçka agravoi në përplasje verbale e më pas në përdorimin e thikave, ku për pasojë tre prej tyre mbetën të plagosur. Mes tyre dhe viktima, i cili në tentativë për t’u larguar ra në tokë pak metra larg vendit të ngjarjes.

Një kalimtare e rastit e mori me makinë dhe e dërgoi në spital, aty ku dhe ndërroi jetë. Ndërkohë një prej adoleshentëve, shok me viktimën, mori 4 plagë, një prej të cilave në kraharor dhe u dërgua në Spitalin e Traumës, aty ku ndodhet në gjendje të qëndrueshme për jetën.

Ndërsa adoleshenti i tretë që mbeti i plagosur në këtë ngjarje mori një plagë në krah dhe u dërgua në një spital privat. Nga hetimet paraprake rezulton që ai të jetë edhe autori i dyshuar i vrasjes së 14-vjeçarit./tvklan.al