Këshilli i BE-së zgjati mandatin e Misionit të Ndihmës Ushtarake të Bashkimit Evropian në Ukrainë për dy vitet e ardhshme dhe ndau 409 milionë euro.

“Këshilli i BE-së vendosi sot të zgjasë mandatin e Misionit të Ndihmës Ushtarake të Bashkimit Evropian për Ukrainën (EUMAM Ukraine) për dy vitet e ardhshme, deri më 15 nëntor 2026, me një buxhet prej rreth 409 milionë euro për periudhën nga 14 nëntori 2024 deri më 15 nëntor 2026”, thuhet në njoftim.

Ai shtoi se EUMAM Ukraine mbetet mjeti kryesor i BE-së për ofrimin e mbështetjes ushtarake për Ukrainën dhe ka detyrën kryesore të zhvillimit të aftësive ushtarake të Forcave të Armatosura të Ukrainës.

Bazuar në vendimin e sotëm, EUMAM Ukraine do të bashkëpunojë me NATO-n, në veçanti me Komandën e Asistencës dhe Trajnimit të Sigurisë së NATO-s për Ukrainën (NSATU), me të cilën do të shkëmbejë informacion në kuadër të aktiviteteve të saj “në mënyrë transparente dhe gjithëpërfshirëse”.

Në njoftim shtohet se detyrat e EUMAM Ukraine do të përmirësohen vazhdimisht, në përputhje me nevojat e Forcave të Armatosura të Ukrainës dhe në koordinim me partnerët ndërkombëtarë.

Sigurimi i një trajnimi të tillë për ushtrinë ukrainase është një nga fushat e bashkëpunimit në kuadër të angazhimeve të përbashkëta të sigurisë të nënshkruara midis BE-së dhe Ukrainës në qershor 2024.

Më 17 tetor 2022, Këshilli i BE-së miratoi një vendim për themelimin e EUMAM Ukraine, me qëllim që të ndihmojë Ukrainën në luftën kundër pushtimit rus, të promovojë zhvillimin e aftësive ushtarake të Ukrainës dhe të mbështesë përpjekjet e saj për të mbrojtur pavarësinë e saj, sovranitetin dhe integritetin territorial brenda kufijve të njohur ndërkombëtarisht.

Deri më sot, EUMAM Ukraine ka ofruar trajnime për 63,000 ushtarë ukrainas. Pritet që në muajt në vijim ky mision të trajnojë rreth 15,000 anëtarë të tjerë të Forcave të Armatosura të Ukrainës./abcnews.al