Ancelotti dhe lojtarët e Real Madridit lëshuan deklarata ‘shpërthyese’ pas ceremonisë së Topit të Artë

09:18 | 29 Tetor 2024
E.G

Carlo Ancelotti dhe disa nga lojtarët e tij të Real Madridit reaguan menjëherë pasi u bë e ditur se fituesi i Topit të Artë 2024 është Rodri dhe jo Vinicius.

Mesfushori spanjoll u bë lojtari i 50-të i cili e fiton këtë çmim prestigjioz në një ceremoni mbrëmjen e së hënës në Paris.

100 gazetarë anembanë botës e votuan Rodrin si lojtarin më të mirë në botë pasi ai luajti rol kyç në sukseset e Ligës Premier dhe Euro 2024 për klubin dhe kombëtaren respektivisht.

Italiani përmes Instagramit reagoi për çmimin ‘Trajneri më i mirë i vitit’, por u sigurua që t’i jap merita Viniciusit.

“Dua ta falënderojë familjen time, presidentin tim, klubin tim, lojtarët e mi dhe mbi të gjitha Vinicius dhe Carvajal”, ka thënë Ancelotti.

Mesfushori Eduardo Camavinga ishte lojtari i radhës i cili dha komentin e tij: “Politikat e futbollit. Vëllau im, ti je lojtari më i mirë në botë dhe asnjë çmim nuk mund të thotë ndryshe”.

Në ndërkohë portieri Andriy Lunin postoi një fotografi të tij dhe Vinicius me mbishkrimin: “Ju jeni më i miri”.

Reagim pati edhe nga Eder Militao i cili shtoi: “Ju jeni më i miri dhe askush nuk mund ta marrë këtë nga ju! Më i miri”.

Përveç këtyre emrave pati reagime edhe nga figura të tjera si Frank Ribery, Toni Kroos, Fede Valverde, Richarlison, Lucas Paqueta e shumë të tjerë që komentuan rezultatin përfundimtar të Topit të Artë.

Vinicius raportohet se anuloi një fluturim privat në drejtim të Parisit dhe një mbrëmje të cilën e kishte organizuar për miqtë e tij pasi mësoi se ai nuk do të jetë fituesi i këtij çmimi./Telegrafi/

Shpërndaje në rrjete sociale

Lajmet më të lexuara

Të ngjashme

Foto lajm