Protestuesit kanë ndërprerë fjalimin e kryeministrit izraelit, Benjamin Netanyahu, gjatë një ceremonie të mbajtur më 27 tetor për të kujtuar viktimat e sulmit të vitit të kaluar të kryer nga Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – ndaj Izraelit.
Protestuesit brohoritën “turp të qoftë” dhe bënë zhurmë, duke e detyruar Netanyahun që ta ndërpresë adresimin, pak pasi nisi të fliste.
Kjo ngjarje, në kujtim të viktimave të sulmit të 7 tetorit 2023, është transmetuar drejtpërdrejt në mbarë Izrealin.
Shumë izraelitë e fajësojnë Netanyahun për dështime që ia mundësuan Hamasit të kryejë sulmin në jug të Izraelit tetorin e vitit të kaluar. Ata e mbajnë përgjegjës kryeministrin izraelit edhe për dështimin për të liruar pengjet e mbetura, që mbahen në Gazë nga Hamasi.
Gjatë sulmit të paprecedent, Hamasi vrau afër 1.200 persona, shumica civilë, dhe rrëmbeu afër 250 të tjerë. Edhe afër 100 pengje gjenden në Gazë, shumica e të cilëve besohet se kanë vdekur.
Si pasojë e ofensivës ajrore, tokësore dhe detare e Izraelit, në Gazë janë vrarë më shumë se 42.000 palestinezë. Sipas Ministrisë së Shëndetësisë në Gazë, shumica e viktimave ishin gra dhe fëmijë.
Izraeli është zotuar se do ta shkatërrojë Hamasin dhe do të kthejë pengjet./rel
Nesër mblidhet Kryesia e Kuvendit, në rend dite përgjimet e ...
Biblioteka Kombëtare e Kosovës dhuron nesër libra për mbi 30...
Mbi 50 projektligje rrezikojnë të kthehen në pikën zero nëse...
Përmbysje rezultatesh, tetë gola të realizuar/ Mbyllet pa fi...
Çeku: Në Prizren gjatë këtij mandati kemi investuar mbi 4.5 ...
Me poza të reja nga Stambolli, Kader Kicaj përsëri merr vëme...