Ish-kandidati për president i opozitës së Venezuelës, Edmundo González ka shkuar në mërgim pasi iu dha azili në Spanjë, një goditje e madhe për miliona votues që i kishin varur shpresat tek fushata e tij për t’i dhënë fund dy dekadave të sundimit njëpartiak.
Largimi i befasishëm i personit që konsiderohet nga opozita e Venezuelës dhe disa qeveri të huaja si fituesi legjitim i garës presidenciale në korrik, u njoftua të shtunën vonë nga Nënpresidentja e Venezuelës, Delcy Rodríguez. Ai pritet të mbërrijë në Spanjë të dielën.
Zonja Rodríguez tha se qeveria vendosi ta lejonte zotin González të largohej i sigurt jashtë vendit, vetëm disa ditë pasi kishte urdhëruar arrestimin e tij, për të ndihmuar në rivendosjen e “paqes dhe qetësisë politike në vend”.
As zoti González dhe as udhëheqësja e opozitës Maria Corina Machado nuk kanë komentuar. Por qeveria e qendrës së majtë në Spanjë tha se vendimi për t’u larguar nga Venezuela ishte vetëm i zotit González dhe se ishte nisur me një aeroplan të dërguar nga forcat ajrore të vendit.
Ai kishte qëndruar në ambasadën spanjolle në Karakas përpara se të largohej. Ministri i Jashtëm José Manuel Albares i tha televizionit kombëtar spanjoll RTVE se qeveria e tij do t’i japë Gonzálezit azil politik, ashtu siç ka kërkuar.
“Sigurisht, i thashë se ishim të kënaqur që ai është mirë dhe rrugës për në Spanjë dhe përsërita angazhimin e qeverisë sonë për të drejtat politike të të gjithë venezuelianëve”, tha Kryeministri spanjoll Pedro Sánchez.
Në një fjalim përpara se të njoftohej largimi i zotit González, ai tha se udhëheqësi i opozitës ishte “një hero të cilin Spanja nuk do ta braktisë”.
Shefi i Politikës së Jashtme të Bashkimit Evropian, Josep Borrell, në një deklaratë të dielën tha se ishte “një ditë e trishtuar për demokracinë në Venezuelë”. Ai shtoi se zoti González “duket të jetë fituesi i zgjedhjeve presidenciale” dhe se BE do të vazhdojë mbështetjen për popullin venezuelian “në aspiratat e tyre demokratike”.
Megjithëse presidenti Nicolás Maduro u shpall fitues i zgjedhjeve të korrikut, shumica e qeverive perëndimore, përfshirë Spanjën, nuk e kanë njohur fitoren e tij dhe po u kërkojnë autoriteteve të Venezuelës të publikojnë të dhënat për votën.
Ndërkohë, fletët e numërimit të mbledhura nga vullnetarët e opozitës nga mbi dy të tretat e makinave elektronike të votimit tregojnë se ish-diplomati 75 vjeçar González kishte fituar. Fletët e numërimit janë konsideruar prej kohësh prova përfundimtare e rezultateve të zgjedhjeve në Venezuelë./voa/
Barella: Sot kundër një skuadre shumë të fortë dëshmuam se m...
Kurti: Të përkushtuar për të vërtetën dhe për drejtësi për t...
Shpërthimet në Liban, reagon kryeministri izraelit Netanyahu
Raportohet për një lëvizje të mundshme të Zhegrovës në të ar...
Biden pret të hënën homologun e Emirateve të Bashkuara Arabe...
Finlanda e mbron vendimin për të blerë armë izraelite