Ministri i ri i Jashtëm i Iranit, Abbas Araghchi, bëri thirrje që përmes dialogut të zgjidhen çështjet dypalëshe me Bashkimin Evropian, pas një bisede telefonike që zhvilloi me kryediplomatin e bllokut.
“Republika Islamike e Iranit mirëpret zhvillimin e raporteve me BE-në në një mjedis të bazuar në respekt të ndërsjellë”, tha Araghchi, sipas një njoftimi për media.
Raportet mes BE-së dhe Iranit janë përkeqësuar viteve të fundit.
Blloku evropian e akuzon Teheranin se po dështon që të frenojë aktivitetin e tij bërthamor, i ofron mbështetje Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – se mbështet luftën e Rusisë kundër Ukrainës dhe shkel të drejtat e njeriut.
Zhvillimi i raporteve “kërkon dialog për zgjidhjen e çështjeve mes dy palëve dhe përmirësimin e politikave të gabuara të shteteve evropiane”, shtoi Araghchi.
Ndërkaq, shefi i diplomacisë evropiane, Josep Borrell, shkroi në platformën X, se kishte biseduar me homologun e tij iranian për “mundësinë e ripërtëritjes së angazhimit në fusha të interesit të përbashkët”.
Ai tha se gjatë bisedës është diskutuar për “nevojën e uljes së tensioneve” dhe “ndaljes së bashkëpunimit ushtarak” me Rusinë dhe për frenimin e aktiviteteve bërthamore.
Borrell tha se një dialog i tillë është “thelbësor dhe është i nevojshëm për uljen e tensioneve rajonale”.
Irani dhe aleati i tij libanez, Hezbollahu – i shpallur organizatë terroriste nga Shtetet e Bashkuara – janë zotuar se do t’i hakmerren Izraelit, pas vrasjes në Bejrut të një komandanti të Hezbollahut dhe të shefit politik të Hamasit – grupit palestinez të shpallur organizatë terroriste nga SHBA-ja dhe BE-ja – në Teheran muajin e kaluar.
Araghchi, që mori detyrën e kryediplomatit më herët gjatë javës, njihet për afërsinë e tij me Perëndimin.
Ai më herët kishte qenë shef i negociatorëve për çështje bërthamore dhe kishte luajtur rol kyç në arritjen e marrëveshjes bërthamore mes Iranit dhe fuqive perëndimore më 2015.
Por, më 2018 presidenti i atëhershëm amerikan, Donald Trump, tërhoqi SHBA-në nga marrëveshja. Përpjekjet për ringjalljen e marrëveshjes deri më tani nuk kanë qenë të suksesshme./Rel/
Barella: Sot kundër një skuadre shumë të fortë dëshmuam se m...
Kurti: Të përkushtuar për të vërtetën dhe për drejtësi për t...
Shpërthimet në Liban, reagon kryeministri izraelit Netanyahu
Raportohet për një lëvizje të mundshme të Zhegrovës në të ar...
Biden pret të hënën homologun e Emirateve të Bashkuara Arabe...
Finlanda e mbron vendimin për të blerë armë izraelite