Eventi i Superkupës e nis zyrtarisht sezonin e ri 2024/25 në basketbollin kosovar.

Superkupa e Kosovës do të luhet nga data 7 deri në 11 shtator, shkruan Arbresh.info.

Ndërsa konkursi për të aplikuar nga klubet e elitës mbetet i hapur deri ditën e nesërme 21.08.2024.

Kështu ka njoftuar Federata e Basektbollit të Kosovës përmes një postimi në rrjetin social Facebook.

Klubi i cili dëshiron të jetë organizator i eventit të Superkupës duhet të përmbush të gjitha kriteret që i ka dhënë FBK-ja.

Për të konkurruar për organizimin e Superkupës së Kosovës – Meshkuj, kandidatët duhet përmbushur këto kushte:

➢ të mos ketë obligime të pakryera ndaj FBK-së (apo marrëveshjen për shlyerjen e obligimeve ndaj FBK-së të nënshkruar);

➢ të sigurojë kushte për zhvillimin e ndeshjeve sipas rregullave të lojës së FIBA-s, Propozicioneve dhe Rregullores së Garave të FBK-së, si dhe akteve tjera normative të FBK-së;

➢ të sigurojë medaljet, kupat dhe trofetë për fituesit dhe finalistët e Kupës në të dyja konkurrencat, dizajnin e të cilave e përzgjedh FBK;

➢ të mbulojë shpenzimet për personat zyrtarë për të gjitha ndeshjet e Superkupës;

➢ ti përmbahet në përpikëri dispozitave të Udhëzuesit për Organizim të Superkupës Kosovës për marketing në palestër dhe në transmetime televizive;

➢ të sigurojë prezencë të mjaftueshme të forcave policore dhe pjesëtarëve të sigurimit privat në të gjitha ndeshjet e Superkupës;

➢ ti përmbahet dispozitave tjera të Udhëzuesit për Organizim të Superkupës;

➢ të nënshkruaj kontratë me FBK-në, ku do të specifikohen detajet e organizimit si dhe obligimet e të drejtat e palëve.

Në rast të përmbushjes së të gjitha kritereve nga dy ose më shumë aplikantë, kriteri financiar është prevalent (kryerja e obligimeve ndaj FBK-së).

Teksa aplikimi do të zgjasë deri në ora 17:00.

Edicionin e fundit Superkupa e Kosovës u mbajt në Suharekë nën organizimin e Golden Eagle Ylli ku fitues i kësaj gare u shpall Trepca që në finale mposhti Pejën.