Komisioneri i Lartë i OKB-së për të Drejtat e Njeriut dënon ashpër deklaratat e ministrit izraelit të financave, Bezalel Smotrich, lidhur me vdekjen nga uria të civilëve në Gaza.

Ministri izraelit tha në fillim të kësaj jave se “askush nuk do të lejojë që dy milionë njerëz të vdesin nga uria, edhe pse mund të ishte e justifikuar dhe morale derisa pengjet tanë të kthehen”, duke shkaktuar reagime ndërkombëtare, madje edhe nga vendet aleate të Izraelit.

Komisioneri i Lartë i OKB-së për të Drejtat e Njeriut, Volker Turk, tha përmes zëdhënësit të tij se ishte “i tronditur nga deklaratat e ministrit se do të ishte e justifikueshme dhe morale të liheshin dy milionë palestinezë të vdisnin nga uria në Gaza, në mënyrë që të liroheshin pengjet”.

Zëdhënësi Jeremy Laërence tha se Turk “dënon në termat më të ashpër të mundshëm këto deklarata, të cilat gjithashtu nxisin urrejtje kundër civilëve të pafajshëm”, duke theksuar se “vrasja e civilëve si metodë lufte është një krim lufte”.

Sipas tij, “kjo deklaratë publike rrezikon të nxisë krime të tjera të tmerrshme për t’u kryer”.

Sipas përfaqësuesit të komisionerit të lartë, deklarata të tilla, veçanërisht nga përfaqësuesit e publikut, duhet të ndalen menjëherë dhe duhet të hetohen, në radhë të parë nga shteti në fjalë.

“Prandaj ne u bëjmë thirrje menjëherë autoriteteve izraelite që të monitorojnë këtë lloj sjelljeje. Është përgjegjësi e izraelitëve”, tha ai./abcnews.al