Trajneri i Real Madridit, Carlo Ancelotti, ka thënë me shaka se ai është zemëruar me Jude Bellingham para rikthimit të tij në stërvitje këtë javë.

Pas përfundimit të Euro 2024 me Anglinë, Bellingham shijoi pushimet e merituara të cilat i kaloi nën shoqërinë e Trent Alexander-Arnold.

Gjatë ditëve në vazhdim, Bellingham do t’i bashkohet Real Madridit në stërvitje para fillimit të sezonit të ri nën urdhrat e Carlo Ancelottit, me italianin që dha një konferencë për shtyp së fundmi.

Ancelotti në këtë intervistë foli për rikthimin e Bellingham, ani pse kontakti me ish-mesfushorin e Dortmundit nuk ka qenë fare i lehtë.

“Jam i zemëruar me Bellingham”, ka thënë Ancelotti para gazetarëve.

Kur u pyet se pse ishte i zemëruar, ai buzëqeshi para se të përgjigjej: “Po, sepse unë e telefonova atë dhe ai nuk u përgjigj. Më pas i thashë Viniciusit që ta telefonojë atë dhe ai menjëherë u përgjigj. Kështu që u zemërova”.

Në vend se ta telefonojë sërish anglezin me telefonin e tij, Ancelotti kishte ide të tjera: “Jo, jo, jo. Vinicius ma kaloi atë (telefonin)”, tha me buzëqeshje ai.

65-vjeçari u pyet gjithashtu nëse roli si lojtar më i avancuar i Bellingham do të ndryshojë këtë sezon pas transferimit të Kylian Mbappe.

“Asgjë nuk ndryshon për të. Asgjë nuk ndryshon. Sezoni i parë, ai më ka befasuar shumë, sepse ka shfaqur një kualitet fantastik. Sezoni i ardhshëm nuk do të jetë ndryshe”, përfundoi Ancelotti./Telegrafi/