Italia aktualisht po përballet me një valë ekstreme të të nxehtit me origjinë nga Afrika, duke bërë që autoritetet të lëshojnë “alarm të kuq” për temperaturat e larta në 11 qytete sot.

Gjendja e rëndë e motit ka çuar në nxehtësi përvëluese në kryeqytetin Romë, ku temperaturat janë regjistruar midis 40 dhe 42 gradë Celsius në mesditë.

Ministria e Shëndetësisë, e cila kategorizon nivelet e rrezikut të temperaturës në katër kode ngjyrash, ngriti shtatë qytete në kategorinë më të lartë “të kuqe” të enjten, ndërsa vala e të nxehtit vazhdon të intensifikohet.

Ndër qytetet është Roma, ku vapa ka ndikuar ndjeshëm në jetën e përditshme.

Turistët që vizitojnë qytetin historik janë parë duke përdorur çadra për t’u mbrojtur nga dielli intensiv, ndërsa radhë të gjata janë krijuar në shatërvanë pasi njerëzit kërkojnë lehtësim nga nxehtësia përvëluese.

Në përgjigje të kushteve ekstreme, autoritetet kanë instaluar ventilatorë të mëdhenj dhe tenda portative në vendet e njohura turistike, përfshirë Koloseun historik, për t’u siguruar vizitorëve zona me hije dhe pajisje ftohëse.

Ministria e Shëndetësisë ka zgjeruar gjithashtu “alarmin e kuq” për të përfshirë katër qytete të tjera sot, duke e çuar numrin total të qyteteve nën paralajmërim për rrezik të lartë në 11. Qytetet e prekura tani janë Roma, Firenca, Bolonja, Campobasso, Frosinone, Latina, Perugia, Pescara, Rieti, Trieste dhe Viterbo.