Më 8 qershor 2024, Prishtina do të jetë dëshmitare e një ngjarjeje të jashtëzakonshme muzikore që do të mbetet gjatë në kujtesën e të gjithëve. Koncerti i titulluar “Shkurte Fejza – 50 Vjet Zëri i Kombit” do të shënojë kulmin e një karriere të ndritshme dhe të pasur të këngëtares së shquar, Shkurte Fejza.

Gjatë pesë dekadave, Shkurte Fejza ka qenë një zë i fuqishëm dhe një figurë frymëzuese për shqiptarët kudo që janë. Përmes këngëve të saj, ajo ka promovuar dashurinë për Kosovën, Shqipërinë dhe identitetin shqiptar. Mesazhet e saj të forta dhe plot pasion kanë arritur zemrat e shumë brezave, duke i bërë ata të ndjehen krenarë për kulturën dhe trashëgiminë e tyre.

Koncerti do të jetë 100% live, një dëshmi e talentit dhe profesionalizmit të Shkurte Fejzës dhe artistëve të tjerë që do të marrin pjesë. Me mbi 40 anëtarë të një orkestre të madhe harmonie, ky koncert premton të jetë një nga më të mëdhenjtë e mbajtur ndonjëherë në kryeqytet.
Koncerti do të mbahet në Pallatin e Rinisë dhe Sportit në Prishtinë në orën 20:00, ndërsa dyert e sallës hapen në orën 19:00 për publikun. Hyrja është pa pagesë si një dhuratë e bilbilit të Kosovës për të gjithë adhuruesit e këngëve të saj dhe dashamirësve të muzikës së mirëfilltë shqipe.

Gjithashtu, ka zëra që qarkullojnë se artistë të tjerë të njohur do të jenë pjesë e këtij koncerti si surpriza të veçanta, duke e bërë këtë ngjarje edhe më të veçantë dhe të paharrueshme.

Me vetëm pak ditë të mbetura deri në datën e koncertit, pritshmëritë janë në kulmin e tyre. Adhuruesit e Shkurte Fejzës, si dhe të gjithë ata që vlerësojnë muzikën dhe kulturën shqiptare, janë të emocionuar për këtë ngjarje të madhe. Gala e madhe e 8 qershorit do të jetë një moment historik që do të mbetet në kujtesën e të gjithëve për shumë vite që do të vijnë.

Mos e humbisni këtë ngjarje unike që do të kremtojë një ikonë të vërtetë të muzikës shqiptare dhe një simbol të vlerave të kombit tonë. /Telegrafi/