“Jemi krenarë e ballëhapur”, Kurti përmbledh arritjet në qeverisjen trevjeçare

16:47 | 23 Mars 2024
R J

Kurti ka thënë se këto tre vite, punësimi është në nivele të paharrueshme, duke u dyfishuar numri i të rinjve të punësuar në tregun e punës.

Eksportet dhe investimet e huaja direkte gjithashtu janë dyfishuar.

Bruto Produkti Vendor është rritur nga 6.7 miliardë euro në 9.6 miliardë euro, duke sjellë një rritje prej 3 miliardë eurove për tri vite qeverisje, me deficit minimal.

Në krahasim me qeveritë e kaluara, të cilat kërkonin tre vite për të shtuar 1 miliard euro në ekonomi përmes borxheve dhe privatizimit, qeveria jonë ka arritur këtë sukses në mënyrë të qëndrueshme.

Ky rezultat na bën të ndjehemi krenar dhe të motivuar për të vazhduar punën e palodhur për qytetarët tanë, duke u bazuar në besimin e tyre të vazhdueshëm në qeverinë tonë.

Postimi i plotë:

Punësimi është më i lartë se çka qenë ndonjëherë. Ka dyfish më shumë të rinj të punësuar në treg të punës se kur e morëm detyrën. Afër 10 mijë të rinj mes moshës 18-29 vjeç janë punësuar përmes platformës qeveritare Superpuna. Mbi 12 mijë gra janë punësuar përmes masave dhe mbështetjes sonë direkte. Eksportet dhe Investimet e Huaja Direkte janë dyfishuar.

Në tri vjet qeverisje rishpërndamë rreth 1.2 miliard euro te qytetarët dhe bizneset përmes masave të shumta, pa krijuar borxhe të reja. Kemi pasur pakon më të madhe mbështetëse në rajonin e Ballkanit për qytetarë në ballafaqim me inflacionin dhe krizën energjetike, si përqindje e Bruto Produktit Vendor sipas Raportit të Bankës Botërore. Shpenzimet kapitale në vitin e kaluar shënuan vlerë rekord prej 555 milionë euro të ekzekutuara. Ndërkohë që borxhin publik e kemi në nivelin më të ulët në Evropë.

Në vitin 2020 faturat e papaguara nga qeveritë e kaluara për mallra dhe shërbime që kanë marrë nga bizneset kanë qenë në vlerë prej 140 milionë euro. Në fund të vitit të kaluar ky borxh është ulur në vetëm 33 milionë.
Qarkullimi i bizneseve në vitin 2023 ishte për 58% më i lartë se ai në vitin 2019, vit parapandemik.
Bruto Produkti Vendor ka arritur vlerën 9.6 miliardë euro, nga 6.7 miliardë euro sa ishte kur morëm qeverisjen nën drejtim – pra 3 miliardë euro më shumë për tri vjet qeverisje, me deficit minimal. Qeverive në të kaluarën u duhej tri vjet kohë për t’ia shtuar 1 miliard euro ekonomisë, dhe atë përmes borxheve dhe shfrytëzimit të fondeve të mbledhura nga privatizimi.

Për këto e më shumë, jemi krenar dhe ballëhapur. Tre vjet pas, entuziazmi i qytetarëve për qeverinë tonë është vullneti ynë për të shërbyer. Besimi i tyre për qeverinë tonë është vlerësimi më i lartë për punën e deritanishme dhe frymëzimi për punën që vazhdon./Arbresh.info/

Shpërndaje në rrjete sociale

Lajmet më të lexuara

Të ngjashme

Foto lajm