Për shkak të mungesës se deputetes Fitore Pacolli-Dalipi, është shtyrë seanca e së mërkurës në Gjykatën Themelore në Prishtinë, në rastin ku e njëjta bashkë me ministrin e Punëve të Brendshme, Xhelal Sveçla dhe deputetët e Vetëvendosjes Drita Millaku dhe Salih Zyba po akuzohen se në mars të 2018-ës kishin ndezur gaz lotsjellës.
Ministri Sveçla dhe tre deputetët nga radhët e LVV-së, Millaku, Zyba dhe Pacolli-Dalipi po akuzohen se më 21 mars 2018, rreth orës 12:10 e deri në orën 15:40, kanë ndezur disa bombola të gazit lotsjellës, të cilat i kishin hedhur brenda sallës së Kuvendit të Kosovës, ku po mbahej seanca plenare e si rrjedhojë e kësaj, të gjithë deputetët ishin detyruar ta lironin sallën e Kuvendit, raporton “Betimi për Drejtësi“.
Lidhur me mungesën e të akuzuarës Pacolli-Dalipi, gjykatësi i rastit Sabit Sadikaj tha se nëse e njëjta mungesën e sotme nuk e ka arsyetuar, ndaj saj për seancën e radhës do të lëshohet urdhëresë për sjellje me detyrim.
Ndërkaq, mbrojtësi i të akuzuarës Pacolli-Dalipi, i caktuar sipas detyrës zyrtare, avokati Lavdrim Salihu tha se e njëjta paraprakisht e ka njoftuar gjykatën përmes emailit se nuk mund të jete prezent në këtë seancë, duke mos dhënë detaje tjera për arsyen e mungesë së saj.
Në këto rrethana, seanca e sotme u shty.
Të pranishëm në seancë ishin ministri Sveçla dhe deputetët Millaku dhe Zyba.
Edhe seanca e fundit për këtë rast e caktuar më 6 shkurt të këtij viti ishte shty në mungesë të të akuzuarës Millaku.
Ndryshe, në tetor të vitit 2021 kishte raportuar ekskluzivisht për aktakuzën e ngritur ndaj ministrit Sveçla dhe deputetëve Millaku, Zyba dhe Pacolli-Rexhepi.
Sipas aktakuzës së siguruar nga “Betimi për Drejtësi”, e cila rezulton të jetë ngritur më 29 korrik 2019, Sveçla, Millaku, Zyba dhe Pacolli-Dalipi po akuzohen se më 21 mars 2018, rreth orës 12:10 e deri në orën 15:40, kanë ndezur disa bombola të gazit lotsjellës, të cilat i kishin hedhur brenda sallës së Kuvendit të Kosovës, ku po mbahej seanca plenare.
Aty thuhet se si rrjedhojë e kësaj, të gjithë deputetët ishin detyruar ta lironin sallën e Kuvendit, me ç’rast kanë pamundësuar vazhdimin e seancës.
Me këtë, secili veç e veç akuzohen se kanë kryer veprën penale “Përdorimi i armës apo mjetit të rrezikshëm” nga neni 375, paragrafi 1 të Kodit Penal, kryerësi i së cilës dënohet me burgim prej një deri në tetë vjet.
Kurse, sipas dispozitivit të dytë, thuhet se secili veç e veç kanë kryer veprën penale “Pengimi i personit zyrtar në kryerjen e detyrave zyrtare” nga neni 409, paragrafi 1 të Kodit Penal, pasi kanë penguar deputetët e Kuvendit të Kosovës ne kryerjen e detyrave zyrtare. Kryerësi i kësaj vepre dënohet me burgim prej tre muaj deri në tre vjet.
Policia shqiptoi afro 2 mijë gjoba brenda 24 orëve
Arrestohet gjilanasi për armëmbajtje pa leje
Ushtria izraelite paralajmëron civilët libanezë që të largoh...
Arrestohen katër persona në Shipol për kontrabandim me emigr...
Kanosi zyrtarët policor, arrestohet një grua në Pejë
Vdes motra e Adem dhe Hamëz Jasharit