Të 27 liderët e BE-së kanë rënë dakord për një paketë ndihme prej 50 miliardë eurosh për Ukrainën pasi Hungaria e kishte bllokuar më parë marrëveshjen.

Presidenti ukrainas Volodymyr Zelensky përshëndeti financimin e ri, duke thënë se ai do të forconte stabilitetin ekonomik dhe financiar të vendit, transmeton Arbresh.info

Ministria e Ekonomisë e Ukrainës tha se pret këstin e parë të fondeve në mars.

Viktor Orban, aleati më i ngushtë i presidentit rus Vladimir Putin në BE, kishte thënë se donte të detyronte një rishikim të politikës së bllokut ndaj Ukrainës dhe kishte vënë në pikëpyetje idenë e dhënies së fondeve për Kievin për katër vitet e ardhshme.

Paketa do të ndihmojë në pagimin e pensioneve, pagave dhe shpenzimeve të tjera gjatë katër viteve të ardhshme. Ajo vjen pasi ndihma ushtarake e SHBA-së për Ukrainën – ofruesi më i madh i mbështetjes ushtarake për Kievin – po mbahet nga Kongresi.

Lajmi për marrëveshjen u njoftua më pak se dy orë pas fillimit të samitit, duke habitur shumë vëzhgues të cilët kishin pritur që bisedimet të vazhdonin shumë më gjatë për shkak të thellësisë së mosmarrëveshjes midis zotit Orban dhe liderëve të tjerë të BE-së.

Marrëveshja për një paketë të re ndihme për Ukrainën kërkon mbështetjen unanime të të 27 vendeve anëtare të BE-së, që do të thotë se deri më tani Hungaria kishte mundur të vërë veton ndaj një marrëveshjeje.

Burime diplomatike i thanë Reuters se marrëveshja e re përfshin një diskutim vjetor të paketës dhe opsionin për ta rishikuar atë në dy vjet, “nëse nevojitet”.

Orban kishte bërë presion për një votim vjetor mbi paketën, por kjo mund ta kishte lënë marrëveshjen të ekspozuar ndaj një kërcënimi vjetor të vetos nga Hungaria.

Presidenti ukrainas Volodymyr Zelensky tha se ai ishte “mirënjohës” ndaj liderëve të BE-së, duke theksuar se vendimi u mor nga të 27 krerët e shteteve në një shfaqje të bashkuar të mbështetjes për Ukrainën, e cila u pushtua nga Rusia gati dy vjet më parë. Zelensky tha gjithashtu se paketa do të “forconte stabilitetin afatgjatë ekonomik dhe financiar” të Ukrainës.

Ministri i Jashtëm i Ukrainës Dmytro Kuleba kishte nënvizuar se bëhej fjalë për investimin e Evropës në sigurinë e saj. Ai theksoi se Ukraina po i rezistonte Rusisë për të gjithë – duke bllokuar përpjekjen e Putinit për të sfiduar rendin botëror me forcë.

Kryeministri polak Donald Tusk, i cili kishte qenë shumë kritik ndaj asaj që ai e quajti “lojën e çuditshme dhe egoiste” të zotit Orban, postoi në X: “Viktor Orban mund të ‘bindhej’… Le të vazhdojmë”.

BE-ja ka mbajtur 20 miliardë euro fonde për Hungarinë për shkak të shqetësimeve për të drejtat e njeriut dhe korrupsionin në vend.

Njoftimi i sotëm për një paketë të re ndihme vjen pasi liderët evropianë ranë dakord të hapin bisedimet e anëtarësimit në BE me Ukrainën në dhjetor – një vendim i përshëndetur në atë kohë si “një fitore” për vendin e tij./Arbresh.info