Në Dhomat e Specializuara të Kosovës (DhSK) në Hagë ka mbarua dëshminë e tij, dëshmitari i 10-të i mbrojtjes, Safet Gashi në gjykimin ndaj Pjetër Shalës.

Gjatë fundit të dëshmisë së tij, për këtë dëshmitar kishte pyetje mbrojtja e viktimave dhe trupi gjykues.

Mbrojtësi i viktimave, avokati Simon Laws dhe anëtari i trupit gjykues, gjyqtari Gilbert Bitti e morën në pyetje këtë dëshmitar në sesion privat.

Pas kësaj seanca vazhdoi në sesion privat ku prokuroria dhe mbrojtja po i paraqesin disa parashtrime lidhur me çështjen gjyqësore.

Gashi e pranon se ka dallime në deklaratat e tij pranë ZPS-së dhe atyre të sotme, gjykatësja i kërkon përgjigje të sakta

(Përditësuar, ora 11:40)- Dëshmitari Safet Gashi e pranoi se ka dallime në deklaratat që i ka dhënë më herët pranë Zyrës së Prokurorit të Specializuar (ZPS) dhe dëshmisë që po e jep tani në çështjen gjyqësore ndaj Pjetër Shalës.

“Ka dallim, e pranoj! Ama dallimi, munet me harru njeri sikur unë që kam harru. Jam kanë në 2019 shtator, unë kam menu që jam kanë në 2019 në prill, e patë edhe vetë gabimin që e kam ba se e kam harru, harron njeri. 5 vjet kanë kalu se le ma po më folni për do fjalë që kanë ndodhë para 25 vite, zonja prokurore, kam harru”, tha dëshmitari Gashi.

Përpara kësaj, kryetarja e trupit gjykues, Mappie Veldt-Foglia ia tërhoqi vërejtjen Gashit lidhur me kontradiktat në mes deklaratave të tij, raporton “Betimi për Drejtësi“.

“Ju lutem përpiquni që të përgjigjeni në mënyrë sa më të saktë që keni mundësi, në mënyrë që të shmangen keqkuptime të ndryshme, a e kuptoni këtë? Pesha e vlerësimit të dëshmisë tënde bëhet më vonë, por ju inkurajoj që të thoni të vërtetën sepse këtu jemi për të gjetur të vërtetën, për të gjetur faktet. Nëse nuk jeni i saktë në përgjigjet tuaja, kjo punë bëhet për ne e vështirë”, tha Veldt-Foglia.

Ajo i tha dëshmitarit se mospërputhja në mes deklaratave të tij, ngrit pikëpyetje për t’u gjetur e vërteta.

“Ju u ballafaquat me disa mospërputhje të mundshme në mes asaj që ke thënë në deklaratat e dhënë ZPS-së dhe asaj që po deklaron në gjykatë dhe ne do ta vlerësojmë këtë më vonë, por kjo ngrit disa pikëpyetje të rënda dhe serioze për faktin se ku është e vërteta. Thjesht desha t’ua kujtoj këtë”, tha Mappie Veldt-Foglia.

Pas mbarimit të kësaj pjese të pyetjeve, me kërkesë të prokurores Gaia Pergolo, seanca kaloi në sesion privat për të vazhduar me pyetje të tjera për dëshmitarin.

Prokurorja evidenton kontradikta në deklaratat e tij, dëshmitari thotë se ishte habitur kur tha se s’ka qenë në Kukës

Në Dhomat e Specializuara të Kosovës (DhSK), në Hagë në gjykimin ndaj Pjetër Shalës, të mërkurën po e vazhdon dëshminë dëshmitari i 10-të i mbrojtjes, Safet Gashi, i cili tha se ishte habitur kur deklaroi në vitin 2019 se nuk ka qenë në Kukës.

Prokurorja Gaia Pergolo tha se ka evidentuar kontradikta në deklaratat e ish-pjesëtarit të UÇK-së, Gashi. Kurse, ky i fundit fillimisht tha se dje nuk e kishte kuptuar pyetjen e avokatit.

“Nuk e kam kuptu pyetjen e thash edhe para trupit gjykues, të parën ditë kur kam shku të marsit atë ditë nuk më kujtohet data saktë, unë në Kukës e kam marrë uniformën dhe kam shku për Kalimash apo Kolsh. Nuk ia kam kuptu zotri avokatit pyetjen mirë”, tha dëshmitari.

Ndërsa, prokurorja Pergolo i tha dëshmitarit se pyetja ishte shumë e qartë.

“Avokati iu ka pyetur a keni shku nga Kosova drejt në Gorozhup dhe ju keni thënë ‘po’, nuk e shoh se çfarë ka pasur të paqartë aty”, tha Pergolo.

Ndërsa, dëshmitari sërish insistoi duke thënë se ndoshta nuk e ka kuptuar pyetjen mirë.

“Nuk e kam kuptu pyetjen ndoshta mirë. Unë e them për të tretën herë këtë, unë kam shku në Kukës, e kam marrë uniformën dhe jemi largu larg Kukësit diku 30-40 kilometra diku afërsi larg Kukësit kjo”, tha Gashi.

Mirëpo, në një deklaratë që Gashi kishte dhënë për ZPS-në në vitin 2019, sipas prokurores Pergolo, ai kishte deklaruar se kurrë nuk ka qenë në Shqipëri.

“Në deklaratën që i keni dhënë ju ZPS-së, ju keni thënë që gjatë dislokimit me UÇK-në, nuk keni qenë kurrë në Kukës, nuk keni qenë kurrë në Shqipëri, a ju kujtohet që e keni thënë këtë në 2019”, tha Pergolo.

Ndërsa, dëshmitari tha se në Kukës ka qenë 1 apo 2 orë.

“Në Kukës nuk jam kanë, jo në Shqipëri. E pranoj. Të merremi vesh, në Kukës 1 orë apo 2 e kam cekë edhe dje që kam nejtë në Kukës më tepër asnjë”, tha Gashi duke bërë që të reagojë prokurorja Pergolo e cila i tha se nuk ishte ashtu.

Sipas prokurores, në vitin 2019, Gashi kishte deklaruar se ai nuk kishte hyrë kurrë në Shqipëri gjatë kohës sa ishte pjesë e UÇK-së.

“Dy kamtë e mija, nuk kanë hy kurrë në territorin e Shqipërisë, kurrë”, tha prokurorja Pergolo duke cituar atë që kishte thënë Gashi në intervistën për ZPS-në në vitin 2019.

“Zonja prokurore, jam habitë, kam thanë ashtu. E pranoj!”, tha dëshmitari Gashi.

Para së të fillojë dëshminë dëshmitari Gashi, kryetarja e trupit gjykues, Mappie Veldt-Foglia dha një urdhër gojë që ka të bëjë lidhur me nxjerrjen e disa materialeve nga ZPS-ja për mbrojtjen.

“Lidhur me njoftimin shtesë të rregullës 102 të Prokurorisë që është parashtrimi i protokolluar… i datës 8 janar 2024. Duke pasur parasysh numrin e kufizuar të materialeve, do të veprojmë si në vijim me qëllim që mbrojtja t’i marrë ato materiale në mënyrë sa më të shpejtë nëse i kërkojnë. Mbrojtja duhet të informojë ZPS-në se cilat materiale nga këto të renditura në njoftim dëshiron që t’i ketë dhe përmes nxjerrjes apo konsultimit të materialeve dhe do të japë një njoftim sot me datën 10 janar deri në orën 13:00”, tha gjykatësja gjatë marrjes së këtij urdhri.

Ajo shtoi se ZPS-ja duhet të nxjerrë dhe t’i japë qasje në këto materiale të caktuara të kërkuara nga mbrojtja sot, deri më 11 janar 2024.

“Nëse mbrojtja kërkon nxjerrjen e këtyre materialeve sipas rregullës 103 që kërkojnë përcjelljen e këtyre materialeve me redaktime, ZPS të bëjë kërkesë para trupit gjykues të njëjtën ditë, pra të enjten, 11 janar 2024 deri në orën 13:00. Kështu që nëse ZPS-ja dëshiron të kundërshtojnë materialitetin e dëshmive të kërkuara nga mbrojtja, duhet ta paraqes këtë kundërshtim të trupi gjykues”, theksoi Veldt-Foglia.

Ndryshe, Safet Gashi ka filluar dëshminë e tij të martën (9 janar 2024), ku është marrë në pyetje fillimisht nga mbrojtja e Pjetër Shalës.

Gashi deklaroi se ka qenë pjesëtar i Ushtrisë Çlirimtare të Kosovës në zonën ku janë zhvilluar luftimet në një vend të quajtur Gorozhup. Ai tha se nuk e ka njohur dhe s’e ka parë Pjetër Shalën gjatë kohës së luftës.

Gjatë muajit shkurt 2023 ka filluar gjykimi në këtë rast, ku më 21 shkurt Prokuroria dhe mbrojtja e viktimave kanë paraqitur deklaratat e tyre hyrëse, kurse më 22 shkurt janë dëgjuar deklaratat hyrëse të mbrojtjes së Pjetër Shalës, si dhe deklarata pa betim e tij.

Në mars 2023 ka filluar paraqitja e provave të Prokurorisë, ku janë dëgjuar 10 dëshmitarë, kurse në gusht ka filluar paraqitja e provave nga mbrojtësi i viktimave ku janë dëgjuar dy dëshmitarë.

Pjetër Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.

Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.

“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.