Përmes një mesazhi në rrjetet sociale, ambasadori amerikan në Prishtinë, Jeff Hovenier, e bëri të qartë se Uashingtoni pret që gjatë vitit 2024 Kosova dhe Serbia të zbatojnë plotësisht marrëveshjen drejt normalizimit të raporteve, e këtu përcolli dhe një mesazh për veshët e Beogradit: Dialogu duhet të përmbyllet me njohje të ndërsjellë mes dy shteteve.

“Në 2024, shpresojmë të shohim një përparim real, duke përfshirë Serbinë që ndërmerr hapa të rëndësishëm për përmbushjen e të gjitha detyrimeve të saj sipas kësaj marrëveshjeje, si dhe Kosovën që gjithashtu i përmbush detyrimet e saj, përfshirë këtu lëvizjen drejt themelimit të Asociacionit të komunave me shumicë serbe. Përfundimisht, ky proces i normalizimit përmbyllet me njohjen e ndërsjellë mes Kosovës dhe Serbisë, teksa të dyja vendet kërkojnë të përmbushin rrugëtimin e tyre drejt BE-së. Zbatimi i Marrëveshjes Bazë dhe Aneksit të zbatimit paraqet një hap madhor drejt asaj të ardhmeje”, u shpreh Hovenier.

Kosova dhe Serbia e arritën në 27 shkurt në Bruksel, Marrëveshjen Bazë, dhe paskësaj në Ohër u pajtuan edhe me Aneksin e zbatimit të saj, i cili megjithatë, nuk ka filluar ende.

In 2023, though we have experienced some difficult moments together, a lot of progress has been achieved that we should acknowledge and celebrate. Above all, our 🇺🇸🇽🇰 partnership & friendship remains strong. Wishing you and yours a happy, healthy, and prosperous 2024. pic.twitter.com/GJsDvOCwXz

— Ambassador Jeff Hovenier (@USAmbKosovo) December 29, 2023

Ujdia prej 11 nenesh parashikon mes të tjerash edhe një nivel vetëmenaxhimi për komunitetin serb në Kosovë dhe njohje të ndërsjellë të simboleve shtetërore, ndërsa kërkon nga Prishtina dhe Beogradi që t’i vënë në jetë po ashtu, të gjitha marrëveshjet e mëhershme të dialogut.