Policia e Kosovës ka konfiskuar para të falsifikuara në Vushtrri dhe Lipjan.

Në Vushtrri, një zyrtare e bankës ka raportuar se gjatë deponimit të pazarit të një biznesi ka hasur në 314 monedha metalike me nga dy euro dhe dy monedha metalike me nga një euro, shkruan Arbresh.info.

“Rr. Ismail Qemali, Vushtrri 01.12.2023-16:30. Me datë 04.12.2023 ankuesja femër kosovare zyrtare e bankës, ka raportuar se gjatë deponimit të pazarit ditor të një biznesi nga dëshmitari mashkull kosovar, janë hasur 314×2 € dhe 2×1 €, që dyshohet të jenë të falsifikuara. Monedhat e dyshuara janë konfiskuar për ekzaminime të mëtejshme”, thuhet në raportin 24 orësh të Policisë së Kosovës.

Ndërsa në Lipjan, një person ka deponuar në bankë 181 monedha metalike me nga dy euro që dyshohet se janë të falsifikuara.

“Sheshi Adem Jashari, Lipjan 04.12.2023-14:40. Ankuesja femër kosovare, zyrtare e bankës, ka raportuar se një klient ka deponuar në bankë 181 monedha të metalta nga dy (2) €, që dyshohet të jenë të falsifikuara. Njësiti i hetimeve në vendin e ngjarjes ka sekuestruar monedhat e dyshuara. Rasti duke u hetuar”, thuhet në raportin 24 orësh të Policisë së Kosovës./Arbresh.info