Gjatë një operacioni të kryer nga Izraeli në kampin e refugjatëve Xhenin në Bregun e pushtuar Perëndimor janë vrarë 13 palestinezë, thanë zyrtarët shëndetësorë palestinezë.

Ushtria izraelite tha se ka vrarë të paktën dhjetë militantë. Grupi militant palestinez, Hamas, tha se nëntë prej të vrarëve në këtë operacion ishin luftëtarë të tij.

Në operacionin izraelit u krye edhe sulme me dronë.

Dhuna në Bregun Perëndimor është rritur që kur ka shpërthyer lufta midis Izraelit dhe Hamasit më 7 tetor. Forcat izraelite thanë se kanë arrestuar mbi 20 palestinezë, kanë konfiskuar armë dhe municione si dhe kanë shkatërruar një tunel nëntokësor. Dy militantë janë vrarë gjatë përleshjeve teksa ushtria po largohej, sipas ushtrisë izraelite.

Banorët thanë se ushtria izraelite kreu operacionin të ndarë në dy faza. Rreth orës 01:00, banorët raportuan se forcat izraelite hynë në qytet, duke përdorur buldozerë për të hapur rrugën. Në orën 10:00, forcat hynë sërish, duke sulmuar në disa lokacione me droonë.

Gjysmëhëna e Kuqe Palestineze tha se një prej pjesëtarëve të saj është qëlluar në shpinë dhe është plagosur nga forcat izraelite që shënjestruan një autoambulancë. Ky grup publikoi fotografi në X – që më herët njihej si Twitter – duke shfaqur autoambulancën e qëlluar me plumb.

Që kur Hamasi sulmoi Izraelin më 7 tetor, duke vrarë 1.400 persona, dhuna në Bregun Perëndimor është rritur. Izraeli që atëherë ka kryer disa bastisje në këtë territor, duke vrarë dhjetëra palestinezë.

Ndërkaq, si pasojë e luftimeve në Rripin e Gazës janë vrarë mbi 10.000 palestinezë, ka raportuar Ministria e Shëndetësisë në Gazën e udhëhequr nga Hamasi./rel