Kryeministri i Kosovës, Albin Kurti ka folur për sukseset e dy vite qeverisje në fushën e energjetikës teksa shtoi se energjia elektrike është interes kombëtar dhe se siguria energjetike është siguri kombëtare.

Me anë të një postimi në Facebook, Kurti kujtoi gjendjen me energji në dimrin e vitit 2021 duke thënë se kapacitetet tona prodhuese janë të kufizuara e i përkasin shekullit të kaluar, shkruan Arbresh.info.

“Dimri i vitit 2021 na rikujtoi në mënyrën më brutale brishtësinë energjetike. Kapacitetet tona prodhuese janë të kufizuara. I takojnë shekullit të kaluar dhe me dekada nuk është investuar në shtimin e tyre. Kurse konsumi i energjisë është rritur në vazhdimësi. Dallimi duhet të plotësohet me import të energjisë. Por importi është shumë i shtrenjtë. Veçanërisht gjatë dimrit. Veçanërisht në ekonominë post-pandemike dhe pas agresionit rus në Ukrainë.”, shkroi Kurti.

Tutje ai tha se gjatë këtyre dy vjet e gjysmë qeverisje, është punuar në mënyrë metodike për zgjidhjen afatgjate.

“Fillimisht ndamë 120 milionë euro për të siguruar furnizim të rregullt me rrymë dhe për të mbrojtur qytetarët dhe bizneset nga rritja e çmimit të energjisë, të shkaktuar nga kriza energjetike. Pastaj, vendosëm themelet për rritjen e kapaciteteve të prodhimit, duke siguruar 700 milionë euro investime në këtë sektor, në mesin e tyre marrëveshja për bateritë me MCC-në në vlerë prej 237.6 milionë dollarë. Kurse në të njëjtën kohë, kemi nxitur uljen e konsumit të rrymës duke subvencionuar kursimin e saj, dhe rritur efiçiencës përmes masave mbështetëse për pajisje elektrike dhe të ngrohjes. Janë mbi 208 mijë familje kursimtare që kanë përfituar nga subvencionimi i faturave të energjisë, dhe 10 mijë sosh që kanë përfituar nga subvencionimi i blerjes së pajisjeve efiçiente të energjisë. Ndërkaq 67 ndërtesa publike janë rinovuar për efiçiencë energjetike dhe ka filluar puna në realizimin e projektin 80 milionësh për Ngrohje Qëndrore me panele solare, përmes së cilit do të ulim konsumin e rrymës për ngrohje dhe do të kujdesemi për ambient të pastër.”, tha shefi i ekzekutivit.

Sipas tij, kjo zgjidhje siguron se në të ardhmen do të kemi më shumë prodhim, sidomos nga burime të ripërtërishme, dhe më pak shpenzim të rrymës.

“Rrjedhimisht siguri energjetike më të lartë, dhe pavarësi më të madhe nga importi.”, shkruan  kryeministri Kurti.

Ndër të tjera, i pari i Qeverisë, tha se në vitin 2022 eksporti i shërbimeve të TIK në vitin 2022 ishte rritur për 114% në krahasim me vitin paraprak.

“Qeveria është e përkushtuar të investojë në infrastrukturën digjitale, rritjen e kapaciteteve njerëzore dhe ekosistemin e inovacionit, që mundësojnë zhvillimin e mëtejshëm të sektorit të TIK në vend.”, shkruan ai.

Kurti thotë se mbulueshmëria e zonave të vanuara me internet brezgjerë është 100% duke shtuar se janë alokuar frekuencat për rrjetin 5G.

“Së bashku me partnerë zhvillimorë jemi në proces të trajnimit të mbi 3,500 të rinjve dhe të rejave në fusha të ndryshme të TIK-ut. Përkrahëm trajnimin në TIK edhe të mbi 900 të tjerëve përmes sistemit të voucher-ëve”, u shpreh kryeministri Kurti.

Më tej, Kurti  përmendi edhe hapjen e Parkut të Teknologjisë Digjitake në Prishtinë duke thënë se janë duke u investuar 8 milionë euro në  infrastrukturën dhe zhvillimin e Parkut të Inovacionit dhe Trajnimeve (ITP) në Prizren.

“Në ITP është themeluar qendra për ekselencë digjitale, në kuadër të së cilës janë krijuar laboratori për printim dhe skanim 3D, qendra e të dhënave të rrjetit kombëtar për kërkim dhe edukim të Kosovës (KREN), si dhe klasat e pajisura për trajnime në fushën e TIK-ut.”, shtoi Kurti.

“Drejt të ardhmes, për të cilën po investojmë sot.”, përfundoi kreu i ekzekutivit./Arbresh.info/