Presidenti gjerman Frank-Walter Steinmeier tha se Berlini dhe Uashingtoni “janë të vendosur” në mbështetjen e tyre për Ukrainën, pas një takimi me Presidentin Joe Biden në Shtëpinë e Bardhë të premten.
“Presidenti Biden më siguroi sërish sot në bisedimet që patëm se ne mund të mbështetemi tek Shtetet e Bashkuara. Për këtë arsye ishte e rëndësishme për Presidentin Biden dhe për mua që të dërgojmë këtë sinjal së bashku sot. Ne do të vazhdojmë mbështetjen për Ukrainën në luftën e saj për liri dhe demokraci”, tha Presidenti gjerman.
Ky ishte takimi i parë midis Presidentit Steinmeier dhe homologut të tij amerikan Biden dhe erdhi mes shqetësimeve në rritje për qëndrueshmërinë e mbështetjes perëndimore për luftën e Ukrainës kundër agresionit rus.
Presidenti demokrat Biden po përballet me një kundërshtim në rritje nga republikanët e Kongresit ndaj përpjekjeve të tij për të vazhduar ndihmën për Ukrainën, në prag të fillimit të fushatës presidenciale në Shtetet e Bashkuara. Deri më tani, Shtetet e Bashkuara kanë qenë kontribuesi më i madh i ndihmës ushtarake të Perëndimit për Kievin.
Ndërkohë në Gjermani, kancelari Olaf Scholz po i reziston thirrjeve në rritje për të furnizuar Ukrainën me raketa me vetëdrejtim “Taurus”, që shumë analistë thonë se i ngjajnë debatit të fundit mbi pajisjen e Ukrainës me tanket “Leopard”./voa
Dubois ‘i fik dritat’ Joshuas dhe mbron titullin...
Sekretet e mbijetesës në orbitë
”Google” shton rregullat, kontrolle kundër falsifikimeve dhe...
Kur barnat kundër dhimbjeve fillojnë të ndikojnë?
Consumer Reports zbulon dhjetë veturat më të mira dhe më të ...
10 këshilla që fëmija juaj të krijojë zakone të shëndetshme ...