Kryetari i Partisë Demokratike të Kosovës, Memli Krasniqi ka reaguar pas vrasjes së një polici të Kosovës në veri dhe plagosjen e një tjetri, duke e quajtur sulm direkt kundër shtetit të Kosovës.

Me anë të një postimi në Facebook, Krasniqi ka kërkuar nga qytetarët të jenë vigjilent e të përmbajtur sepse siç thotë ai përshkallëzimi i situatës në veri i konvenon vetëm Serbisë, shkruan Arbresh.info.

Mes tjerash, i pari i PDK-së ka kërkuar nga organet përgjegjëse që hetimet e plota të bëhen sa më shpejt dhe përgjegjësit të sillen para drejtësisë për të marrë dënimet meritore

Postimi i plotë i Krasniqit:

Jam i tronditur nga lajmi për vrasjen e një pjesëtari të Policisë së Kosovës dhe plagosjen e një tjetri, sot në pjesën veriore të Kosovës. I shpreh ngushëllimet më të thella familjes së policit të rënë në detyrë, ndërsa policit të plagosur i uroj shërim sa më të shpejtë.

Sot, në këtë moment të dhembjes, qëndrojmë të bashkuar në përkrahje të policëve tanë, të cilët, përkundër sfidave ditore e sulmeve të bandave kriminale të kontrolluara nga Beogradi, po mbrojnë sovranitetin shtetëror në pjesën veriore të shtetit tonë.

Ftoj të gjithë që ta dënojnë fuqishëm këtë sulm kriminal kundër Policisë së Kosovës, që është sulm direkt kundër shtetit të Kosovës. Kërkoj nga organet përgjegjëse që hetimet e plota të bëhen sa më shpejt dhe përgjegjësit të sillen para dtejtësise për të marrë dënimet meritore.

Në të njëjtën kohë, apeloj tek të gjithë qytetarët për vigjilencë e vetëpërmbajtje, sepse përshkallëzimi i situatës në veriun e vendit tonë i konvenon vetëm Serbisë dhe bandave kriminale nën kontrollin e saj. Po ashtu, ftoj partnerët ndërkombëtarë të Kosovës që të dënojnë qartë sulmin dhe t’i kërkojnë Serbisë urgjentisht ndalimin e ndërhyrjeve në territorin e Kosovës dhe provokimit të mëtejmë të situatës./Arbresh.info

Lexo edhe:

Detaje nga vrasja e një polici në veri dhe plagosja e një tjetri