Rasti i parë i etheve të minjve është diagnostikuar këtë vit në Kosovë.

Këtë e ka bërë të ditur vet Instituti Kombëtarë i Shëndetit Publik, ku përmes një shkrimi të gjatë ka dal me disa r4ekomandime për popullatën, shkruan lajmi.net.

Tutje i është bërë thirrje prindërve që të kenë kujdes për fëmijët e tyre pasi kjo sëmundje përhapet përmes ushqimit, dhe se frutat duhet të lahen me patjetër para përdorimit.

Njoftimi i plotë:

ETHET E MINJVE

Prindër të nderuar!

Kujdesuni për fëmijët tuaj!

Ruani ushqimet nga minjtë!

Mos përdorni fruta mali të palara sepse mund të sëmureni nga ethet e minjve!

Duke qenë se Instituti Kombëtar i Shëndetësisë Publike përcjell situatën epidemiologjike me ethet e minjve, për çdo vit paraqiten raste sporadike, të cilat në Kosovë janë të përhapura, në rajonin e Dukagjinit, rajonin e Karadakut dhe rajonin e Shalës, varësisht nga shumimi i minjve.

Në laboratoret e mikrobiologjisë diagnostikuam rastin e parë sivjet me ethe të minjve!

Burimi i infeksionit janë minjtë. Sëmundja përhapet me ushqim, me aerosole dhe me kontakt. Rastet me ethe hemorragjike me sindromën renale sporadike janë të palidhura mes veti dhe nuk ka ndonjë shpërthim epidemik mes tyre, por pakujdesi gjatë ruajtjes së ushqimit dhe konsumimi i manave të palara mund të shkaktojë sëmundje vdekjepruese.

Në organizmin e njeriut shkaktari hy përmes tri portave hyrëse: trakti respirator, trakti tretës dhe përmes lëkurës.

Trajtimi i sëmundjes bëhet me sukses të plotë në Klinikën Infektive në qoftë se paraqiten me kohë. Po që se të sëmurët kërkojnë ndihmë me vonesë paraqiten komplikime, e që mund të bllokohen veshkat.

Klinika Interne, gjegjësisht repartet e dializës janë të gatshme që të hemodializojnë përkohësisht pacientët. Ndërsa, Instituti Kombëtar me laboratorët e vet, e diagnostikon sëmundjen brenda ditës.

Masat parandaluese

Pengimi i futjes së brejtësve në shtëpi dhe stane.

Ruajtja e ushqimit nga ekskretet e brejtësve.

Përpunimi termik i artikujve ushqimor të dyshimtë

Frytet e pyllit mos të konsumohen pa u pastruar

Djathit të freskët t’i shtohet kripë dhe mos tē konsumohet si i freskët nëse dyshohet se është kontaminuar

Gjatë punës në fushë të punohet me maska nëse vërehet shtim të brejtësve

Larja e duarve me ujë dhe sapun te kosarët dhe punëtorët tjerë të fushës para ngrënies

Mos hidhni mbeturina kudo

Të bëhet klorimi i ujit të pijes

Zhdukja e vatrave natyrore të brejtësve

Dezinfektimi i sipërfaqeve të kontaminuara nga ekskretet e brejtësve.