Kryetari i Partisë Demokratike të Kosovës, Memli Krasniqi, ka mbajtur sot një takim të përbashkët në mes të Kryesisë së Partisë dhe Grupit Parlamentar të PDK-së.

Në njoftim thuhet se u diskutua për zhvillimet e fundit politike në vend, respektivisht krizën politike.

“PDK kërkon nga Qeveria e Kosovës që të tregoj se çfarë po ndodhë edhe me situatën në pjesën veriore të Kosovës. Pse lëshoi pe Qeveria dhe pranoi të tërhiqet nga pjesa veriore, pas disa muajve të tensionit dhe detyrimit të aleatëve tanë që t’i vënë sanksione Kosovës? Pse u liruan kriminelët serbë të arrestuar për sulmet ndaj gazetarëve dhe KFOR-it?”

PDK kërkon që vendi të shkojë sa më shpejtë në zgjedhje të përgjithshme të parakohshme.

“Gjithsesi, duke parë se kjo Qeveri nuk ka më asnjë lloj kredibiliteti për të qeverisur me vendin – PDK konsideron se zgjidhja e vetme për ta larguar Kosovën nga kjo rrugë e shkatërrimit të çdo gjëje që është arritur në vitet e lirisë e të shtetësisë, është mbajtja e zgjedhjeve të përgjithshme të parakohshme, sa më parë”.

“Formimi i një qeverie të re që do të kthejë Kosovën në binarët e rrugës euro-atlantike është jetike për vendin dhe të ardhmen e qytetarëve tanë. Vetëm duke rivendosur e forcuar aleancat ndërkombëtare e forcojmë edhe shtetin tonë”, thuhet në njoftimin e kësaj partie.

Pos këtyre, në këtë takim u diskutua edhe për zhvillimet në seancën e 13 korrikut ku pati përplasje mes deputetëve.

“Gjatë këtij takimi, kryetari Memli Krasniqi, Kryesia e Partisë, deputetët e Grupit Parlamentar, dënuan edhe një herë provokimin dhe dhunën e Qeverisë ndaj deputetëve të PDK-së, të shkaktuar në seancën e Kuvendit, të enjten më 13 korrik”.

PDK kërkon gjithashtu edhe zbardhjen e së vërtetës prapa përgjimeve të shefes së Grupit Parlamentar të LVV-së, Mimoza Kusari-Lilës me Milan Radojçiqin./Arbresh.info/