Ish-presidenti i Shteteve të Bashkuara të Amerikës, Donald Trump, ka mbajtur fjalimin e tij të parë publik pas shpalljes së padisë federale ndaj tij këtë javë.

Trump sulmoi Departamentin e drejtësisë- FBI-në dhe administratën Biden, duke thënë se ata “e majta marksiste po e përdor edhe një herë Departamentin e korruptuar të Drejtësisë, FBI-në e korruptuar dhe prokurorët për të ndërhyrë”.

“Ata janë të korruptuar. Këta kriminelë nuk mund të shpërblehen. Ata duhet të mposhten. Ju duhet t’i mposhtni ata”, tha Trump, shkruan The Guardian.

Trump, aktakuzën e fundit e quajti si qesharake dhe të pabazë, teksa shtoi se ajo është “ndër abuzimet më të tmerrshme të pushtetit në histori të vendit”.

Ai përmendi edhe rastin e ish-kundërshtares së tij, Hillari Clinton, të cilën Departamenti i Shtetit e hetoi për disa vite për përdorimin e emailit privat të saj, por s’u gjet asnjë provë bindëse për keqpërdorim të qëllimshëm.

Trump gjithashtu sulmoi Joe Biden mbi dokumentet e klasifikuara nga koha e tij si zëvendëspresident dhe senator, të cilat u gjetën në zyrën e tij në Uashington dhe shtëpinë e tij në Delaware.

“Asgjë nuk i ndodhi Joe. Ai ka kaq shumë dokumente të klasifikuara. Kjo është një fole e sëmurë njerëzish që duhet pastruar menjëherë”, tha Trump përpara turmës.

Kujtojmë se dje është ngritur aktakuzë ndaj ish-presidentit të ShBA-së, Donald Trump, se ka marrë nga Shtëpia e Bardhë gjatë kohës sa ishte president dokumente top sekrete të cilat përmbanin kodet bërthamore e të cilat i fshehu në banjë.