Sekretari amerikan i Shtetit, Antony Blinken, tha më 8 qershor se Shtetet e Bashkuara të Amerikës do t’i ofronin afro 150 milionë dollarë ndihma për zonat në Siri dhe Irak që u çliruan nga grupi ekstremist i Shtetit Islamik.

Blinken njoftoi për këto ndihma gjatë pjesëmarrjes në një konferencë të organizuar nga Arabia Saudite për ta luftuar grupin Shteti Islamik – i cili nuk kontrollon më asnjë territor, por filialet e të cilit ende kryejnë sulme në Afrikë, Azi dhe Lindje të Mesme.

Koalicioni Global për të mposhtur IS-in përfshin më shumë se 80 vende dhe vazhdon të koordinojë veprimet kundër grupit ekstremist, i cili më parë kishte kontrolluar pjesë të mëdha të Sirisë dhe Irakut. Blinken tha se zotimi prej 150 milionë dollarësh i SHBA-së është pjesë e një plani të ri për financim që arrin në më shumë se 600 milionë dollarë.

“Kushtet e dobëta humanitare dhe të sigurisë. Mungesa e mundësive ekonomike. Këto janë lëndë djegëse për llojin e dëshpërimit me të cilin ISIS [Shteti Islamik] ushqehet dhe rekruton”, tha ai në një fjalim të shkurtër në hapjen e konferencës. “Pra, ne duhet të qëndrojmë të përkushtuar ndaj qëllimeve tona të stabilizimit”.

Blinken nuk e specifikoi, por agjencia e lajmeve AP raporton se ndihmat amerikane për Sirinë pritet të rrjedhin përmes aleatëve kurdë,OKB-së ose grupeve ndërkombëtare të ndihmës, në një kohë kur SHBA-ja dhe vendet e tjera të Perëndimit kanë vendosur sanksione ndaj qeverisë së presidentit sirian, Bashar Assad.

Blinken ishte njëri ndër organizatorët e konferencës si pjesë e një vizite dyditore në Arabinë Saudite, në të cilën ai u takua me zyrtarë të lartë sauditë, përfshirë udhëheqësin de fakto të vendit, princin e kurorës, Mohammed bin Salman. Blinken mori pjesë gjithashtu në një takim të ministrave të jashtëm të Gjirit.

Shtetet e Bashkuara janë detyruar të rikalibrojnë aleancën e tyre prej dekadash me Arabinë Saudite, ndërsa mbretëria kërkon të transformohet në një lojtar global të palidhur me Uashingtonin.

Departamenti amerikan i Shtetit tha se Blinken u angazhua në diskutime të gjera me zyrtarë sauditë dhe zyrtarë të tjerë për disa tema, përfshirë përfundimin e luftës në Jemen, mbështetjen e një armëpushimi në Sudan të ndërmjetësuar nga SHBA-ja dhe Arabia Saudite dhe reduktimin e përplasjeve izraelito-palestinez.

Në deklaratë thuhej se ai ngriti gjithashtu shqetësime për të drejtat e njeriut, por nuk ishte e qartë nëse ai i kishte bindur sauditët ta lironin ndonjë të burgosur ose të hiqnin ndalesat në udhëtime./REL/