Policia ka njoftuar se ka arrestuar një 38 vjeçar në Pogradec, pasi i njëjti ka tentuar që ta vrasë me sëpatë fqinjin e tij.

“Tentoi të vriste me mjet prerës (sëpatë) fqinjin e tij, pas një konflikti për motive të dobëta, si rezultat i ndërhyrjes së menjëhershme të Policisë, arrestohet në flagrancë 38-vjeçari. Sekuestrohet një tjetër mjet prerës (thikë) që iu gjet me vete 38-vjeçarit”, thuhet në njoftim të policisë.

Policia në Pogradec pas marrjes së informacionit për një konflikt midis dy fqinjëve, kanën vepruar shpejtë duke bërë të mundur arrestimin në flagrancë të shtetasit E. Sh., 38 vjeç, banues në Pogradec.

Sipas policisë, i njëjti dyshohet se pasditen e djeshme, pas një konflikti për motive të dobëta, ka dëmtuar me mjet prerës (sëpatë), fqinjin e tij, shtetasin K. H., 61 vjeç, banues në Pogradec, i cili aktualisht merr ndihmë mjekësore, në spitalin e Pogradecit dhe është jashtë rrezikut për jetën.

“Në vijim të veprimeve procedurale për këtë rast, shërbimet e Policisë i gjetën 38-vjeçarit, nga kontrolli fizik, një tjetër mjet prerës (thikë), i cili iu sekuestrua në cilësinë e provës materiale”, thuhet në njoftim.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme, për veprat penale “Vrasja me dashje”, mbetur në tentativë dhe “Prodhimi, mbajtja, blerja apo shitja pa leje e armëve të ftohta”.