Arsenali ka fituar në shtëpi ndaj Bournemouth me rezultat 3-2 në kuadër të javës së 26-të të Ligës Premier.

Ndeshja nisi shumë keq për Arsenalin, pasi pranoi gol që në start, me Philip Billing që shënoi për 1-0.

Arsenali u lëshua në sulm dhe rrezikoi dy herë brenda një aksioni me Martin Odegaard dhe Bukayo Saka, por pa sukses.

Edhe në fundin e pjesës së parë, Arsenali rrezikoi, duke kërkuar edhe penallti, por që gjyqtari i ndeshjes nuk mendoi ashtu.

Në fillimin e pjesës së dytë, pritej që Arsenali të barazonte, por ndodhi e kundërta, me Bournemouthin që shënoi.

Mbrojtësi Marcos Senesi shënoi me kokë për 2-0 në minutën e 56-të.

Por Arsenali shpejt u kthye në lojë, kur Thomas Partey shënoi nga brenda zonës për 2-1.

Topçinjtë vazhduan me sulme dhe arritën të barazonin rezultatin në minutën e 70-të me Ben White për 2-2.

Arsenali kërkoi penallti dy herë për prekje të topit në zonë me dorë, por gjyqtari dhe VAR-i heshtën në të dyja rastet.

Kur pritej që të mbyllej ndeshja, në minutën e shtatë të kohës shtesë Reiss Nelson shënoi super gol për 3-2.

Pas kësaj fitoreje Arsenali mbetet lider me 63 pikë, pesë më shumë se Man City që është i dyti. /telegrafi/