Partia opozitare Lidhja Demokratike e Kosovës ka reaguar ndaj qeverisë duke e quajtur të paaftë me rritjen e ngarkesës tatimore.

Sipas LDK-së rritja e tatimit në pronë është një tjetër goditje për qytetarët.

“Qeveria e paaftë ka filluar vitin e ri edhe me një rritje të ngarkesës tatimore për qytetarët e Kosovës. Kjo është edhe një godite tjetër ndaj papërballueshmërisë në kohën kur kosto e rritjes së çmimeve dhe kosto e jetesës ka arritur nivele rekorde në vend”, thuhet në njoftimin për media.

LDK tutje thotë se Ministria e Financave i ka rritur vlerësimin e pronave, prandaj qytetarëve sipas partisë opozitare, po u vinë faturat e tatimit në pronë dy fishë në rritje.

“Për shkak të rritjes së barrës tatimore – si rezultat i rritjes së vlerësimit të pronave nga Ministria e Financave – qytetarët e Kosovës kanë filluar të pranojnë faturat e tatimit në pronë me rritje deri në dyfishim. Kjo ngarkesë shtesë, në kohë të krizës së çmimeve, është e papranueshme dhe e patolerueshme. Vendimet e Ministrisë pa koordinim, janë papërgjegjësi”, thanë nga LDK-ja.

“Me këtë shkallë enorme të inflacionit, në mungesë të rritjes së ardhurave, në rëndesë ekonomike, kjo politikë e Qeverisë na shpërfaqet si një tjetër dështim i madh. Në kohë të papërballueshmërisë, ky është një veprim tjetër i papërgjegjshëm i pushtetit që tashmë veçse është larguar nga qytetari”, thuhet në reagim.

Në fund të komunikatës thuhet se partia opozitare LDK, kërkon nga Qeveria që ti shikojë të gjitha mundësitë ligjore për të pezulluar rivlerësimin e tatimit në prone për vitin 2023.

“LDK kërkon nga Qeveria e Kosovës që urgjentisht të rishikoj të gjitha mundësitë ligjore për të pezulluar rivlerësimin e tatimit në pronë për vitin 2023, duke mos lejuar rritjen e ngarkesës tatimore në pronë për qytetarët e Kosovës. Gjithashtu Ministria e Financave sa më shpejtë ta dërgojë ligjin e ri për tatimin në pronë në Kuvend në mënyrë që t’iu mundësohet komunave ulja e pragut të normës tatimore”, përfundon komunikata./arbresh.info/