Arrestohet ushtari i FSK-së, dyshohet për gjuajtje me armë pas përleshjes fizike me babanë e bashkëshortes së tij

22:28 | 8 Nëntor 2022
E.H

Një ushtar i FSK-së është arrestuar sot në Suharekë pasi që dyshohet se pas një përleshjeje fizike me babin e gruas, ka gjuajtur në ajër me armë zjarri.

Ngjarja ka ndodhur në fshatin Shirokë të Suharekës rreth orës 17:30.

Lajmin për arbresh.info e ka konfirmuar zyrtari për informim i Policisë së Kosovës për Rajonin e Prizrenit, Shaqir Bytyqi.

“Pas një mosmarrëveshjeje i dyshuari i parë A.B., (ushtar i FSK-së jashtë detyrës) dhe i dyshuari i dytë M.B., 54-vjeç (babai i bashkëshortes) janë përleshur fizikisht”, ka thënë Bytyqi.

Bytyqi ka deklaruar se A.B. më pas ka nxjerrë armën dhe ka shtënë në ajër.

Pas kësaj ekipet përkatëse kanë dalë në vendin e ngjarjes dhe personat janë arrestuar.

Sipas Policisë, A.B. ka pasur armë jozyrtare, por me leje ndërsa arma dhe 14 fishekë janë sekuestruar.

Me rastin po merren Hetimet Rajonale të Drejtorisë së Policisë në Prizren./arbresh.info/

Shpërndaje në rrjete sociale

Lajmet më të lexuara

Të ngjashme

Foto lajm