Lidhja Demokratike e Kosovës u ka tërhequr vëmendjen qeverisë Kurti që të kontraktojnë operatorë të energjisë me çmim të favorshëm dhe jo të presin dimrin, kështu ka thënë për arbresh.info deputetja e Lidhjes Demokratike të Kosovës (LDK), Valentina Bunjaku Rexhepi.

“Qeveria Kurti nuk është më qeveri praktikantësh sepse kanë kaluar tanimë gati 20 muaj që e qeverisin vendin. Praktika e tyre si duket ka kaluar në rutinë sepse qysh vitin e kaluar në verë LDK u ka tërhequr vëmendjen që të kontraktojnë operatorë të energjisë me çmim më të favorshëm e jo të presim dimrin”, tha ajo.

Sipas saj, kjo qeveri nuk është duke punuar për dimrin që po vjen.

“Në tetorin e vitit të kaluar neglizhenca e tyre u paraqit në Kosovë duke pasur edhe reduktime e më vonë edhe shtrenjtim maksimal e të papërballueshëm për qytetarët tanë. E as tani kjo qeveri nuk është duke punuar që dimrin që po vjen ta presim qetë, përkundrazi do të jetë edhe më i rëndë”, tha deputetja e LDK-së.

Ajo shton se këtë gjendje e ka sjellë kjo qeveri e cila tanimë ka degraduar, dhe se opozitën e vendit e trajtojnë si armik e jo si kundërshtar politik.

“Krejt këtë gjendje e ka sjellë kjo qeveri e cila tanimë ka degraduar, e opozitën e vendit e trajtojnë si armik e jo kundërshtar politik”, thekoi Bunjaku Rexhepi.

Sipas saj, qytetarët pozitën nuk i konsiderojnë partnerë por njerëz të paditur dhe mashtrues.

“E në anën tjetër qytetarët tanimë nuk i konsiderojnë partnerë por njerëz të paditur dhe mashtrues që sa ishin vet në opozitë trumbetonin me akuza e në asnjë mënyrë shpresë dhe alternativë pozitive”, tha Valentina Bunjaku Rexhepi.

Kujtojmë se vitin e kaluar Kosova është përballur me reduktime dhe shtrenjtim të rrymës./Fjolla Bajraktari/arbresh.info/