Ka filluar trajnimi i grupit të dytë për deminim i grave dhe burrave nga Ukraina, të cilët ndodhen në Kosovë. Trajnimi i tyre po bëhet nga   Kompania private për deminim “MAT Kosova”. Gjithsejtë 13 ukrainas, në mesin e tyre 7 femra, janë pjesë e trajnimit intensiv nga instruktorë të deminimit. Ata po mësohen se si të zbulojnë minat e pagjetura dhe mjetet e pashpërthyera dhe t’i asgjësojnë ato.

Lufta në Ukrainë po i ofrohet 100 ditëshit, ndërkaq në Kosovë, shumë larg atdheut të tyre, të rinjtë ukrainas, u janë nënshtruar kurseve intensive të deminimit për të ndihmuar vendin e tyre, që kur të kthehen atje t’i largojnë mjetet e pashpërthyera, të lëna nga ushtria ruse.

Gjithsejtë 13 ukrainas, në mesin e tyre 7 femra, kanë ardhur në Kosovë për të marrë trajnim intensiv nga instruktorë të deminimit që po bëhet nga Kompania private për deminim “MAT Kosova”.

Anastasia Yehorova, nga Sloviansk i rajonit Donetsk, për Radio Kosovën thotë se ka pasur oferta nga miqtë e saj për t’u strehuar në vende të ndryshme për shkak të luftës, por ajo bashkë me familjen e saj ka zgjedhur të qëndrojë në Ukrainë dhe t’i ndihmojë popullit të Ukrainës. Në Kosovë thotë ajo ka ardhur vetëm për kurse trajnimi për deminim:

“Të gjitha njohurit do t’i përdorim në Ukrainë për asgjësim të mjeteve të pashpërthyera si dhe për inspektimet teknike dhe jo teknike”, thotë Donetsk.

Edhe Nina, nga Kievi, njëherësh edhe pjesëtare e Ushtrisë së Ukrainës, thotë se kanë nevojë për kurse të tilla dhe përvoja në fushën e deminimit:

“Pasi të kthehemi në Ukrainë, pas këtij kursi, qëllimi im është që t’i ndaj njohuritë e fituara këtu me ushtrinë tonë”, tregon ajo.

Hekuran Duli, instruktori kosovar i deminimit që po trajnon këtë grup nga Ukraina, eksperiencën në fushën e deminimit e ka marrë pas luftës së viteve 98-99 në Kosovë. Ai thekson se Ukraina do të kalojë në një situatë të ngjashme sikur Kosova për sa i përket mjeteve të pashpërthyera. Duli sqaron se kursantët janë duke u trajnuar në nivelin e dytë për identifikimin e mjeteve të rrezikshme, që janë duke u përdorur nga rusët në luftën e Ukrainës.

“Ne kemi një numër të madh të mjeteve që janë duke u përdorur në Rusi dhe kemi mjete shkollore që janë përdorur në luftërat në Ballkan- Kosovë,Bosnje, Kroaci dhe Lindjen e Mesme,por edhe në Rusi”, rrëfen Duli për Radio Kosovën.

Përshkallëzimi i agresionit të armatosur i Rusisë kundrejt Ukrainës, është dënuar nga e gjithë bota demokratike. Shumë vende kanë ofruar strehim për qytetarët në nevojë nga Ukraina. Kosova është në mesin e vendeve perëndimore që kanë dënuar luftën ruse, ndërsa ka ofruar strehim për disa qytetarë dhe  disa gazetarë nga ky vend.