Çmimi i grurit është rritur në tregjet ndërkombëtare pasi India ndaloi eksportin e drithërave bazë.

Indeksi standard i grurit u rrit me 5.9% në Çikago, më i larti që ka qenë në dy muaj.

Ndalimi i eksportit vjen pasi një valë e të nxehtit goditi të korrat e grurit të Indisë, duke i çuar çmimet vendase në një nivel rekord.

Kostoja e çdo gjëje, nga buka dhe ëmbëlsira te petë dhe makaronat është rritur muajt e fundit pasi çmimet e grurit u rritën në tregjet botërore të mallrave.

Qeveria e Indisë tha se do të lejojë ende eksporte të mbështetura nga letra kredie që janë lëshuar tashmë, dhe për vendet që kërkojnë furnizime “për të përmbushur nevojat e tyre të sigurisë ushqimore”.

Zyrtarët qeveritarë thanë gjithashtu se ndalimi nuk ishte i përhershëm dhe mund të rishikohej.

Megjithatë, vendimi është kritikuar nga ministrat e bujqësisë nga grupi i shtatë vendeve (G7) që takohen në Gjermani.

“Nëse të gjithë fillojnë të vendosin kufizime eksporti ose të mbyllin tregjet, kjo do të përkeqësonte krizën,” tha ministri gjerman i ushqimit dhe bujqësisë Cem Ozdemir, raportoi BBC news.

G7 është një organizatë e shtatë ekonomive më të mëdha në botë të ashtuquajturat “të avancuara”, të cilat dominojnë tregtinë globale dhe sistemin financiar ndërkombëtar. Ato janë Kanadaja, Franca, Gjermania, Italia, Japonia, Britania e Madhe dhe Shtetet e Bashkuara.

Megjithëse India është prodhuesi i dytë më i madh në botë i grurit, ajo nuk ka qenë më parë një eksportues i madh pasi shumica e të korrave të saj shitet në tregjet e brendshme, percjell Arbresh info.

Por eksportet e grurit të Ukrainës ranë pas pushtimit rus. Dhe me thatësirat dhe përmbytjet që kërcënonin të korrat në prodhues të tjerë të mëdhenj, tregtarët e mallrave prisnin që furnizimet nga India të kompensonin një pjesë të mungesës.

Përpara ndalimit, India kishte synuar të dërgonte një rekord prej 10 milion ton grurë këtë vit./arbresh.info/