Një ngjarje e shëmtuar ka ndodhur sot në futbollin kosovar, në ndeshjen mes Gjilanit dhe Ballkanit, e vlefshme për xhiron e 27-të të Superligës së Kosovës.

Nga një harkim nga goditja e këndit, portieri i Gjilanit, Enea Koliçi shënoi në minutat shtesë të ndeshjes për të barazuar rezultatin në 1-1.

E ky gol “çmendi” tifozët vendas, të cilët vërshuan fushën dhe sulmuan portierin e Ballanit, Stivi Frashëri.

Frashëri përfundoi në emergjencë pas goditeve të marra, derisa gjendja e tij raportohet të jetë stabile.

Në lidhje me këtë “katrahurë” ka reaguar edhe klubi i Gjilanit, të cilët dënojnë ashpër skenat në stadiumin e tyre./Arbresh.info

Reagimi i plotë i tyre:

KOMUNIKATË ZYRTARE:

Sport Club Gjilani dënon ashpër incidentin e ndodhur në duelin e xhiros së XXVII-të në BKT Superligë ndaj skuadrës së Ballkanit.

Si klub nikoq i kësaj ndeshje kishim ndërmarrë të gjitha masat e sigurisë për të garantuar sigurinë dhe mbarëvajtjen e ndeshjes, ndër të tjerash kishim siguruar edhe qëndrimin e tifozëve mysafir.

Për planin operacional të sigurisë dhe organizimit të ndeshjes janë njoftuar para ndeshjes personat zyrtar nga Federata e Futbollit e Kosovës, si dhe vet klubi mysafir.

Për fat të keq situata u agravua në minutat shtesë të ndeshjes me rastin e golit të barazimit dhe si rrjedhojë e reagimit të dobët nga Policia e Kosovës erdhi edhe incidenti, me ç’rast u lëndua futbollisti Stivi Frashëri, të cilit i urojmë shërim të shpejtë në rend të parë dhe ndjesë për këtë ngjarje, e cila vetëm Sport Club Gjilanit nuk guxon t’i ndodh.

Gjithashtu, Klubit Futbollistik “Ballkani” i kërkojmë ndjesë publike dhe i garantojmë gjithashtu që ky akt i shëmtuar nuk do t’i dëmtojë asnjëherë raportet e klubeve mes vete.

Zyrtarët përgjegjës për siguri dhe organizimin e ndeshjes kanë evidentuar vërejtjet pas përfundimit të ndeshjes dhe po punojnë në identifikimin e personave të cilët kryen këtë akt vandal, për t’u ndaluar përjetësisht hyrjen në ndeshjet e organizuara nga Sport Club Gjilani.

Sport Club Gjilani shpreh keqardhje për gjithë atë se çfarë ka ndodhur dhe do të përkujdeset me përgjegjësinë më të lartë që ky të jetë incidenti i fundit, në ndeshjet të cilat organizohen nga klubi.

Sport Club Gjilani

03 Prill, 2022