Janë shtuar rastet e raportuara në Polici për kapje të parave të falsifikuara.

RTK ka qenë në Agjensinë e Kosovës për forenzikë ku edhe bëhet ekzaminimi i monedhave dhe monedhave metalike që dyshohet se janë të falsifikuara. Sipas tyre vetëm në tremujorin e fundit divizioni i ekzaminimit i kartmonedhave ka pranuar 200 raste të parave të falsifikuara.

Ditë më parë , Enver Ademit dikush i shkoi në market me 50 euro të falsifikuara, të cilat i vërejti pasi ato i kontrolloi paraprakisht.

“Po ka pasur tentim me ma lëshu paren e falsifikuar e kam marrë dhe e kam shikuar në këtë mënyrë e kam parë që sështë origjinal i kam thënë nuk është për mu kjo”, tha Enver Ademi, shitës.

Në Kosovë ditët e fundit kanë filluar të qarkullojnë kartëmonedha dhe monedha metalike që dyshohet se janë të falsifikuara. Vendet ku po tentohen të kryhen pagesat me para të falsifikuara janë edhe pikat e karburanteve. Njëri nga menaxherët e një pike i tha RTK-së parapa kamerës se ditë më parë ka pranuar 500 euro të falsifikuara nga një person dhe se tashmë policia po merret me këtë rast.

Shpeshtimi i rasteve ka bërë që institucioni që merret me ekzaminimin e të hollave të rrisë punën.

“E kemi shenjën e ujorit e cila është shumë e rendesishme ku vërehet se tek e falsifikuara nuk shihet fare”, Feriz Selimaj- ekspert I forenzikes se monedhave.

Eksperti i forenzikës tregon se edhe te numrat serikë vërehet paraja e falsifikuar.

Pas përfundimit të ekzaminimit, këta të fundit bëjnë edhe raportin të cilin më pas e merr hetuesi i policisë, i cili është marrë me rastin e që cilësohet vepër penale.

Sipas statistikave që i posedon Agjencia e Kosovës për Forenzikë, në tremujorin e vitit 2022 nga 200 raste që kanë pranuar, janë gjetur 60 kartëmonedha të falsifikuara.

Ditë më parë në raportin e policisë janë publikuar 14 raste për të cilat policia ka filluar hetimet ndaj personave që kanë deponuar para të falsifikuara në bankat e vendit, markete dhe pika të karburanteve e që ka pasur edhe të arrestuar.