Një paciente me leuçemi në Shtetet e Bashkuara është bërë gruaja e parë dhe personi i tretë deri më tani që është shëruar nga HIV pas transplantimit të qelizave staminale. Rasti, i prezantuar të martën në Konferencën mbi Retroviruset dhe Infeksionet Oportunizite në qytetin amerikan të Denverit, ishte i pari që përfshin gjakun e kordonit kërthizor për të trajtuar leuçeminë akute mieloide, e cila fillon në qelizat e formimit të gjakut në palcën e kockave.

Që nga marrja e gjakut të kordonit, gruaja e moshës së mesme dhe e racës së përzier, ka qenë në remision dhe pa HIV për 14 muaj, pa pasur nevojë për trajtime të fuqishme të njohura si terapi antiretrovirale. Sharon Lewin, presidentja e zgjedhur e Shoqatës Ndërkombëtare për AIDS tha në një deklaratë se:

Ky është tani raporti i tretë i një kurimi në këtë mjedis dhe i pari te një grua që jeton me HIV.

Dy rastet e mëparshme ndodhën te meshkujt, një i bardhë dhe një latin, të cilët kishin marrë qeliza staminale, më shpesh të përdorura në transplantet e palcës kockore. Kjo qasje e re mund ta bëjë trajtimin në dispozicion për më shumë njerëz, sipas studiuesve. Rasti është pjesë e një studimi më të gjerë të udhëhequr nga Universiteti i Kalifornisë, Los Anxhelos dhe Universiteti Johns Hopkins në Baltimore që ndjek 25 persona me HIV që i nënshtrohen transplanteve me qeliza staminale për trajtimin e kancerit dhe kushteve të tjera serioze.

Pacientët në provë fillimisht i nënshtrohen kimioterapisë për të vrarë qelizat imune kancerogjene dhe më pas marrin qeliza staminale transplantuese nga individë me një mutacion gjenetik specifik, në të cilin u mungojnë receptorët e përdorur nga virusi për të infektuar qelizat. Shkencëtarët besojnë se këta individë më pas zhvillojnë një sistem imunitar rezistent ndaj HIV. Lewin tha se ndërsa transplantet e palcës së kockave nuk janë një strategji e zbatueshme për të kuruar shumicën e njerëzve që jetojnë me HIV, raporti konfirmon se një kurë për HIV është e mundur dhe forcon më tej përdorimin e terapisë gjenetike si një strategji e qëndrueshme për një kurë HIV./topradio/