Pavarësisht se është rritur mes talljeve për faktin se ka qenë një refugjate në Londër, Rita Ora thotë se kjo e ka bërë edhe më të vetëdijshme për respektin që duhet pasur ndaj njerëzve.

Në një intervistë të fundit për The Independen, Ora ka folur mbi temën e refugjatëve, duke thënë se do të jetë përherë një zë në mbështetje të tyre.

“Ndonjëherë është e vështirë t’u shpjegosh jo-refugjatëve se si është të jesh refugjate, sepse nuk bëhet fjalë për një zgjedhje me dëshirë”, ka thënë Ora.

“Nuk bëhet fjalë për të ndjerë keqardhje për ne. Bëhet fjalë më shumë për një votë mundësie. Nuk e di nëse do të isha këtu në këtë shtëpi ëndrrash nëse nuk do të ishte zhvendosja ime në Mbretërinë e Bashkuar. Dhe ku do të isha nëse nuk do të më ishte dhënë kjo mundësi”, tha këngëtarja shqiptare.

Qëndrimi i Mbretërisë së Bashkuar ndaj refugjatëve nuk është përmirësuar shumë që kur familja e Rita Orës mbërriti 30 vjet më parë; vetëm disa javë më parë, 27 refugjatë u mbytën në një kanal duke u përpjekur të arrijnë në Britani dhe qeveria u përgjigj duke premtuar masa më të ashpra dhe jo kalim të sigurt.

“Prindërit e mi erdhën në Mbretërinë e Bashkuar për ne – kështu që ne mund të rriteshim në një mjedis më të sigurt”, thotë Ora, e cila është ambasadore e UNICEF-it në Mbretërinë e Bashkuar, duke u fokusuar në punën e tyre për refugjatët.

“Dhe për pjesën tjetër të jetës sime, do të ndihem pafundësisht e pasionuar pas refugjatëve, sepse jam një refugjate dhe do të jem gjithmonë e tillë. Jam shumë krenare që jam një refugjate. Dhe unë mendoj se shpesh ka një stigmë rreth refugjatëve. Një stigmë që me të vërtetë po e përdor misionin tim ta thyej”, tha këngëtarja shqiptare.

Përgjatë të njëjtës intervistë, 31-vjeçarja ka folur edhe për ndjenjën e fajit që ka mbi supet e saj, pas thyerjes së rregullave anti-COVID vitin e kaluar, me organizimin e një feste për ditëlindje në ditën kur Mbretëria e Bashkuar ishte në izolim kombëtar.