Pikërisht në ditën më të madhe të popullit shqiptar, sot më 28 nëntor, është vendosur gurthemeli për ndërtimin e Aeroportit të Vlorës në Shqipëri.

Ky aeroport do të ndërtohet nga kompania Mabetex Group e biznesmenit kosovar, Behgjet Pacolli.

Në ceremoninë e vënies së këtij gurëthemeli, Pacolli tha se është shumë i lumtur që është pjesë e kësaj vepre dhe pikërisht në qytetin e Vlorës, në të cilin në 20 vitet e fundit e feston 28 nëntorin.

“Unë jam shumë i lumtur që jam aktori kryesor i kësaj vepre, jam i lumtur që kjo ndodh në vendin tim, jam i lumtur që kjo ndodh në qytetin, të cilin e kam shumë për zemër. Unë pothuajse 20 vitet e fundit asnjëherë nuk kam munguar të jam në festën e madhe të Pavarësisë këtu në Vlorë. Sot jemi me një gjë madhështore”, u shpreh Pacolli.

Ai falënderoi edhe kryeministrin e Shqipërisë, Edi Rama, i cili ia ka besuar punën kompanisë së tij.

“Jam i lumtur që sot jam këtu para kryeministrit, të cilin unë e preferoi, një kryeministër me energji të paparë, një kryeministër me dëshirë shumë të madhe me ndryshu Shqipërinë. Kryeministër ju ia keni dalë kësaj punë dhe ju përgëzoi ju dhe bashkëpunëtorëve tuaj. Jeni duke punuar për qytetarët tanë, popullin tonë dhe ju them me modesti edhe ne kemi të drejt të kemi një të ardhme më të mirë, edhe ne kemi të drejtë të kemi një jetë më të mirë për fëmijët tanë, për vetveten dhe për gjithë miqtë tanë”, tha Pacolli.

Biznesmeni kosovar premtoi se Aeroporti i Vlorës do jetë një nga aeroportet më të bukura dhe më funksionale në trojet shqiptare.

“Na qoftë e mbarë fillimi i kësaj vepre madhështore dhe ju garantoj se shumë shpejt në eventin tjetër, ne këtu do avancojmë shumë me punë dhe do të vije dita që sipas marrëveshjes dhe kontratës ne ta hapim këtë aeroport. Do jetë aeroporti më i bukur në këto troje, më funksional i këtyre trojeve. Unë e di atë, pasi jam i sigurt se do të ndodh kjo. Nuk e flas veç me hamendje, por e them dhe bazohem në eksperiencën time dhjetëra vjeçare dhe me faktin se unë bashkëpunoj me njerëz që garantojnë efiqiencë dhe kualitet.

Pacolli në fund ua uroi të gjithëve festën e 28 Nëntori./arbresh.info/

LEXO EDHE

Sot vihet gurthemeli për ndërtimin e Aeroportit të Vlorës  – Arbresh.info