Shkruan Blerim Reka
Sot, është 76 vjetori i OKB-së; themeluar pas Luftës së Dytë Botërore, për të parandaluar luftën e tretë. Luftë të re botërore nuk pati, por luftërat rajonale nuk u ndalën . As mbi 2 mijë rezolutat e Këshillit të Sigurimit, as “preventive diplomacy” dhe as forcat e saj paqeruajtëse, nuk krijuan një paqe botërore. Gjenocidi në Srebrenicë, madje ndodhi para syve të helmetave blu të UNPROFOR-it.
Në hyrje të dekadës së tetë të ekzistimit të saj, kjo organizatë mbetet peng i interesave të shteteve të caktuara të “pesëshes së madhe”. Në vend të instrumentit për ruajtjen e paqes, vetot në Këshillin e Sigurimit, u shëndërruan në instrument interesi. Me mbi 100 veto, Rusia, mbetet bllokuesja kryesore e vendimarrjes botërore. Kundërshtimi i saj ndaj anëtarësimit të Republikës së Kosovës në OKB, e dëshmon këtë më së miri; ndonëse pa ofruar asnjë argument bindës.
Në mungesë argumenti, Kremlini përsërit vetëm frazën bajate se qenka për “respektimin e së drejtës ndërkombëtare”. Cilës? Sepse e drejtë ndërkombëtare është Mendimi i GjND-së për Kosovën i vitit 2010, të cilin Rusia nuk e përfill!
Moska vazhdon të thirret ende në një rezolutë (1244/99), që i ka skaduar afati i përdorimit dhe mbron UNMIK-un, që as vet se din pse është në Kosovë? Shefi i saj, javën e kaluar u bë zëdhënës i Beogradit gjatë raportimit para KS, duke u thirrur në “sovranitetin e RFJ”; një shtet inekzistent tash e dy dekada, e duke injoruar shtetin e ri- pas 17 shkurtit 2008. Si funksionar i OKB-së, ai injoroi mendimin e qartë të GJND-së, se pavarësia e Kosovës nuk është në kundërshtim me të drejtën ndërkombëtare.
Zyrtarët e saj, pra nuk respektojnë as instancën më të lartë gjyqësore të organizatës që i paguan! Rusia, nuk përfill as mendimin e organit kryesor gyqësor të OKB-së, duke bllokuar anëtarësimin e Kosovës, me një rezolutë jashtë realitetit. Parimi klasik juridik na mëson se ligji i mëvonshëm, derogon ligjin e mëparshëm. (“lex posterior, derogat lex prior”). Në rastin e Kosovës: norma e mëvonshme juridike e organit gjyqësor të OKB-së (Mendimi i GJND-së, 2010), derogon normën e mëhershme të një organi tjetër të OKB-së (Rezolutën e KS, 1999).
Pse atëherë duhet shpenzuar buxhetin e OKB-së për një Gjykatë, mendimet e së cilës nuk i respektojnë as organet e saj e as shtetet anëtare? Pse duhet financuar tash e 22 vite një UNMIK, që mbron interesat e jo parimet? Kjo është pra OKB-ja sot, që propagon sundim ligji në tërë botën, e vet e shkel të njejtin parim. Ajo ka nevojë për reformim të brendshëm, po aq sa edhe për zgjerim të jashtëm të Këshillit të Sigurimit me dy anëtarë të rinj të përhershëm: Germaninë dhe Japoninë, ndër kontribuesit më të mëdhenj të buxhetit të saj.
Perandoritë e mëdha u shkatërruan nga paligjshmëria dhe byrokratizimi i brendshëm, duke shkelur parimet në emër të interesave.
Shkrimi është marrë nga profili në Facebook, i Blerim Rekës.
Vikendi me diell, temperaturat shkojnë deri në 22 gradë Cels...
Bjellorusia e ndërpret ndërtimin e kampit ushtarak afër kufi...
Gjermania kërkon kontrolle shtesë për emigrantët
Problemet me gjumin tek personat që vuajnë nga artriti, ja d...
Mbi 29 000 emigrantë kanë kaluar La Manshin këtë vit
Hakerat kinezë synuan të marrin të dhëna nga telefonat e Don...