Kryeministri britanik Boris Johnson deklaroi se kriza klimatike është shumë më e keqe se sa pandemia e koronavirusit të ri (COVID-19), duke shtuar se sektori privat duhet të shpenzojë “triliona” për të luftuar krizën klimatike, transmeton Anadolu Agency (AA).

Boris Johnson iu drejtua udhëheqësve të biznesit në “Samitin Global të Investimeve” të mbajtur në Muzeun e Shkencës në Londër me pjesëmarrjen edhe të themeluesit të kompanisë teknologjike Microsoft, Bill Gates.

Johnson në fjalimin e tij deklaroi se sektori privat duhet të shpenzojë “triliona” për të luftuar krizën klimatike dhe theksoi rëndësinë e qeverisë që punon me sektorin privat dhe organizatat ndërkombëtare për të drejtuar tregun e teknologjisë së gjelbër.

Duke deklaruar se pandemia COVID-19 tregoi se si qeveritë dhe sektori privat duhet të punojnë së bashku për të tejkaluar problemet globale, Johnson deklaroi se ky është një mësim që duhet të zbatohet në luftën kundër ndryshimit të klimës.

“Ne po përballemi me një sfidë edhe më të madhe për njerëzimin, ndryshimi i klimës po kërcënon mënyrën tonë të jetesës dhe shumë më keq se COVID-19. Në vetëm pak javë, bota do të takohet në Glasgow. Shpresoj që të gjithë do të jeni atje sepse mësimi nga COVID-19 është absolutisht i qartë”, tha Johnson.

Në qytetin Glasgow do të mbahet Konferenca e 26 -të e Palëve në Konventën në Kuadër të Kombeve të Bashkuara për Ndryshimet Klimatike.

“Ne duhet të dëgjojmë shkencëtarët. Ne kemi nevojë për reagim urgjent të qeverisë, por gjithashtu duhet të mobilizojmë tregjet. Ne duhet të përfshijmë sektorin privat. Me miratimin e Ministrit Britanik të Financave, Rishi Sunak, unë mund të ndaj miliarda. Por ju, në këtë dhomë, mund të ndani triliona”, tha Johnson.

Partneritet prej 400 milionë për të trajtuar krizën klimatike

Nga ana tjetër është njoftuar do të bëhet një partneritet prej 400 milionë funtesh midis kompanisë jofitimprurëse të Bill Gates, Breakthrough Energy dhe qeverisë britanike për të ulur koston e teknologjisë së gjelbër dhe për të investuar në trajtimin e krizës klimatike në të gjithë Mbretërinë e Bashkuar.

“Partneriteti ynë me Britaninë e Madhe do të përshpejtojë vendosjen e këtyre zgjidhjeve kritike të klimës dhe do të ndihmojë t’i bëjë më të përballueshme dhe të arritshme. Ne duhet të ulim kostot e teknologjive të pastra për të arritur zero emetime, për të konkurruar dhe zëvendësuar produktet me emetim të lartë që përdorim sot”, tha Gates.