Një numër në rritje i republikanëve, duke përfshirë guvernatorë shtetesh, janë zotuar të ndërmarrin veprime ligjore kundër masave gjithëpërfshirëse të Presidentit Joe Biden për vaksinimin e detyruarkundër COVID-19.

Keqinformimi rreth vaksinimit, siç ishte postimi i këngëtares Nicki Minaj në Twitter, ku thotë se vaksina e koronavirusit shkakton impotencë dhe guvernatorët republikanë që kundërshtojnë urdhrin e vaksinimit së Presidentit Joe Biden, janë disa nga sfidat me të cilat po përballet administrata në përpjekjet për të vaksinuar më shumë amerikanë.

“Unë propozova që vaksina të jetë e detyruar, ndërsa guvernatori i atij shteti e quajti atë “lëvizje tipike tirane”. Ky është lloji më i keq i politikës, sepse po vë në rrezik jetën e qytetarëve të shteteve të tyre, veçanërisht të fëmijëve. Unë refuzoj të dorëzohem para kësaj”, tha Presidenti Biden.

Të enjten, Presidenti Biden kritikoi guvernatorët republikanë për kundërshtimin e urdhrit të shpallur javën që shkoi, që u kërkon të vaksinohen punonjësve federalë dhe personelit të kujdesit shëndetësor si dhe punonjësve të kompanive me mbi 100 punëtorë.

Më shumë se dhjetë shtete kanë miratuar ligje, që ndalojnë vaksinimet e detyrueshme kundër COVID-19, apo kërkesën e dëshmisë së vaksinimit.

“Kur keni një president si Biden që lëshon dekrete antikushtetuese kundër popullit amerikan, ne kemi përgjegjësi të mbrojmë Kushtetutën dhe të kundërshtojmë. Ne po e bëjmë këtë në shtetin e Floridës”, tha Guvernatori Republikan, Ron DeSantis.

Edhe pse vaksinat janë falas, vetëm 55 për qind e amerikanëve janë vaksinuar plotësisht. Administrata shpreson se urdhri mund ta rrisë këtë numër.

Vaksinimi i detyruar mbështetet nga 60 për qind e amerikanëve, sipas një sondazhi të fundit nga Axios-Ipsos.

“Mbështetja e shumicës fsheh ndarje shumë të thella partiake, ku mbi 80 për qind e demokratëve dhe mbi 60 për qind e të pavarurve mbështesin vaksinimin e detyruar, por vetëm rreth 30 për qind e republikanëve e mbështesin atë, duke refletuar ndarjen e vazhdueshme për çështje që lidhen me COVID-in”, thotë Chris Jackson nga kompania Ipsos.

Vendimet për kufizimet gjatë pandemisë vunë në rrezik të ardhmen politike të guvernatorit demokrat të Kalifornisë, Gavin Newsom, i cili u përball me zgjedhje të postaçme për ta shkarkuar, por që arriti të mbijetojë.

“Ne i thamë po shkencës, vaksinave dhe përfundimit të kësaj pandemie”, tha Guvernatori Newsom.

Ai arriti të fitojë në zgjedhje me një diferencë të madhe, por vetëm pasi demokratët kryesorë përfshirë Presidentin Biden dhe Nënpresidenten Kamala Harris shkuan në Kaliforni për të ndihmuar fushatën e tij. /voa