Kryetari i Këshillit për Mbrojtjen e të Drejtave të Veteranëve, Xhevdet Qeriqi, ka deklaruar se për ta ishte e habitshme deklarta e Zëvendës-kryeministrit Besnik Bislimi në lidhje me hapjen e arkivave të UÇK-së.

Për emisionin Edicioni Special në Klan Kosova ai tha se çdokush në Kosovë e di që Ushtria Çlirimtare e Kosovës s’ka pasur arkiva dhe se nuk i posedon as sot.

“Është mire me i pyet ata se ku janë ato arkiva. Unë punoj qe një kohë të gjatë në shoqata të dala nga lufta dhe e vetmja arkivë është dosja e secilit pjesëtar të UÇK-së”.

“Ekzistojnë disa video që quhen arkiva të luftës, të krimeve që i ka kryer Serbia në Kosovë dhe video të ndryshme gjatë periudhës së luftës çlirimtare. Ato janë publike që i ka parë i gjithë spektri ndërkombëtar dhe që ishin edhe arsyeja pse NATO e bombardoi Serbinë”.

“Serbia po kërkon që fillimisht Kosova t’i publikojë arkivat, por ne nuk kemi arkivë tjetër, dhe kështu ata duan t’i shmangen arkivës së tyre që tregon si i kanë kryer qindra masakrat në Kosovë”.

“Serbia mendon të kërkojë arkiva shtese që s’janë publikuar, por ato nuk ekzistojnë. Interesi i tyre është që të ankohen që Kosova nuk po do t’i hap arkivat në mënyrë që të gjejë arsye për të mos i publikuar arkivat e tyre. Këtë do ta merr si argument, ky është preteksti dhe qëllimi i tyre”.

“Kosova ka rënë në grackë me Serbinë sepse ata kërkojnë diçka që nuk ekziston. Mundohen me çdo kusht që ta fshehin krimin që e kanë kryer dhe ta barazojnë viktimën me kriminelin”.

Qeriqi tutje deklaroi se Bislimi është dashur që fillimisht të bashkëbisedonte me ish ushtarët e shtabit të UÇK-së dhe të informohej rreth komplet luftës së kësaj ushtrie, si dhe sugjeroi që ai duhet të parapërgatitet para se të shkojë në dialog me Serbinë.

Po ashtu, tha se djali i Ukshin Hotit, i cili është kryetar i delegacionit për të pagjeturit, ka qenë shumë i ri në kohë të luftës dhe se shumë pak i njeh ngjarjet, duke sugjeruar se aty duhet të jetë një person tjetër më i pjekur në moshë, sepse siç tha, në këto raste të ndjeshme nevojitet përvoja.