Në Kosovë është duke vazhduar vaksinimi i qytetarëve kundër coronavirusit, ku tashmë të drejtë për të marrë vaksinën kanë të gjithë qytetarët mbi moshën 18 vjeçare.

Në Kosovë janë duke u dhënë dy lloje të vaksinës kundër COVID-19, Pfizer dhe AstraZeneca, ndërkaq së fundi, Ministria e Shëndetësisë ka njoftuar qytetarët se kanë të drejtë të zgjedhin se cilin lloj të vaksinës duan të marrin, ndërkohë kanë bërë të ditur se ka doza të mjaftueshme të të dyja llojeve të vaksinave, transmeton Telegrafi.

Ministria e Shëndetësisë ka njoftuar po ashtu se qytetarët të cilët kishin caktuar termin për të marrë vaksinën sot më 20 korrik, MSH ua ka shtyrë terminet për ditën e nesërme, e mërkurë për shkak të festës së Kurban Bajramit.

Në anën tjetër, ministri i Shëndetësisë, Arben Vitia, në urimin e tij për festën e Kurban Bajramit, kërkoi edhe një herë nga qytetarët që të marrin vaksinën.

“Festat si kjo janë shprehje e adhurimit, e gëzimit për përkrahjen e njeri-tjetrit. Tashmë kur po përballemi me pandeminë, është e rëndësishme që të vaksinohemi sa më shpejt dhe të mbrojmë vetën dhe të tjerët. Ndaj në këtë ditë përcillni porosinë të afërmve tuaj, miqve e shokëve se mbrojtja e shëndetit është detyrë për të gjithë. Le të marrim vaksinën që festat e ardhshme t’i festojmë me plot hare”, ka thënë ministri Vita.

Ndryshe, sipas të dhënave të fundit të Ministrisë së Shëndetësisë, të përditësuara më 17 korrik, numri i qytetarëve që kanë marrë dozën e parë të vaksinës është 220 mijë e 250 qytetarë, kurse dozën e dytë e kanë marrë 90 mijë e 165 qytetarë.

Kosova ka lehtësuar masat antiCOVID javë më parë, ku me vendimin e Qeverisë janë lejuar ahengjet familjare si dhe janë lejuar të punojnë lokalet e natës.