Presidenti i zgjedhur i Iranit, Ebrahim Raeisi, i bëri thirrje SHBA-së për të përmbushur angazhimet e saj sipas marrëveshjes bërthamore të vitit 2015, duke përjashtuar negociatat e reja mbi programin bërthamor të vendit, raporton Anadolu Agency (AA).

Në konferencën e tij të parë për media pas fitores në zgjedhjet presidenciale të 18 qershorit, Raeisi tha se mesazhi i tij për administratën e presidentit amerikan Joe Biden është të kthehet në detyrimet e saj sipas marrëveshjes dhe të heqë sanksionet e vendosura ndaj Teheranit.

Raeisi tha se Washington-i zyrtar duhet të “mbahet përgjegjës” për shkeljen e angazhimeve të tij sipas marrëveshjes bërthamore, të njohur gjithashtu si JCPOA.

Ai tha se fushata e “presionit maksimal” të SHBA-së kundër Teheranit ka dështuar, duke përjashtuar negociatat e reja me Perëndimin mbi programin bërthamor të Iranit.

Në pyetjen nëse do të ishte i gatshëm të takonte Biden-in, Raeisi dha një përgjigje të ngurtë me një fjalë: “Jo”.

Ai tha se ekipi negociator i Iranit që aktualisht është i angazhuar në negociata me fuqitë botërore në Vjenë për të ringjallur marrëveshjen bërthamore do të ndjekë bisedimet. Ai shtoi se heqja e sanksioneve dhe kthimi i SHBA-së në angazhimet e saj sipas marrëveshjes do të pasohet nga verifikimi nga Irani.

Raundi i gjashtë i bisedimeve midis Iranit dhe fuqive botërore në Vjenë për ringjalljen e marrëveshjes bërthamore të vitit 2015 u shty dje, ndërsa delegatët u kthyen në kryeqytetet e tyre përkatëse për konsultime rreth vendimeve përfundimtare.

Presidenti i sapozgjedhur e quajti programin e raketave balistike të Iranit “të panegociueshëm”, një qëndrim i mbajtur nga të gjitha qeveritë e mëparshme në Teheranit.

Raeisi më tej tha se politika e jashtme e qeverisë së tij nuk do të kufizohet në marrëveshjen bërthamore dhe se ai do të kërkojë bashkëveprim me botën. Ai foli gjithashtu për dëshirën e qeverisë së tij për të pasur “marrëdhënie miqësore” me vendet fqinje.

Raeisi gjithashtu tha se marrëdhëniet me Kinën kanë “kapacitet të madh” për zgjerim, duke e quajtur Pekinin një aleat të rëndësishëm për Iranin. Ai gjithashtu premtoi mbështetjen e vazhdueshme të Teheranit për “popullin e shtypur të Palestinës”, duke thënë se atyre duhet t’u jepet e drejta të vendosin fatin e tyre.

Në lidhje me Jemenin, ai tha se Irani është kundër ndërhyrjes së huaj në vendin e shkatërruar nga lufta dhe është në favor të asaj që jemenasit që drejtojnë vendin e tyre.

Më tej, presidenti i ardhshëm i Iranit tha se politikat e brendshme të qeverisë së tij do të përqendroheshin në “përmirësimin e jetesës së njerëzve” dhe do të punonin në “rivendosjen e besimit e njerëzve në qeverinë”.

Raeisi gjithashtu e bëri luftën kundër korrupsionit një prioritet për qeverinë e tij, për të cilën tha se do të fillojë nga dita e parë e mandatit të tij.