Në Bruksel sot po mbahet Samiti i NATO-s, në të cilin Maqedonia e Veriut do të përfaqësohet nga kryeministri Zoran Zaev. Ky është takimi i parë i kryetarëve të shteteve ose qeverive të anëtarëve të Aleancës, në të cilin Maqedonia e Veriut merr pjesë si një anëtare e plotë e NATO-s.

Siç njofton korrespodentja e MIA-s nga Brukseli, liderët e 30-të vendeve anëtare do të diskutojnë për të ardhmen e Aleancës dhe sfidat e saj.

Qëllimi i sekretarit të Përgjithshëm të NATO-s Jens Stoltenberg është që liderët të pajtohen me një agjendë “ambicioze” të sigurisë dhe mbrojtjes për vitin 2030. Ai do të paraqesë një sërë propozimesh për liderët, duke përfshirë përforcimin e dimensionit politik të Aleancës, si dhe përforcimin e mbrojtjes kolektive të vendeve anëtare dhe rezistencën e infrastrukturës.

Siguria kibernetike, ndryshimet klimatike dhe, natyrisht, rritja e buxheteve të mbrojtjes së vendeve anëtare do të jenë ndër temat më të rëndësishme të diskutimit. Marrëdhëniet me Rusinë dhe Kinën do të jenë gjithashtu midis temave kryesore të diskutimit, veçanërisht se si NATO duhet të pozicionohet në lidhje me ngritjen e këtyre dy fuqive botërore.

Stoltenberg e mirëpriti faktin se që nga viti 2014, vendet anëtare të Aleancës kanë rritur në mënyrë të vazhdueshme buxhetet e tyre të mbrojtjes dhe deri në vitin 2024, të gjitha 30 vendet janë zotuar të arrijnë 2 për qind të prodhimit të brendshëm bruto për qëllime ushtarake.

“Të gjitha sfidat kërkojnë rritje të vazhdueshme të investimeve në mbrojtje. Shpenzimet e mbrojtjes janë rritur për shtatë vitet e fundit me radhë, duke shtuar 260 miliardë dollarë që nga viti 2014, por ne duhet të investojmë edhe më shumë për të arritur ambicien tonë të lartë”, tha të premten shefi i Aleancës.

Ai përmendi sondazhet e fundit të opinioneve të kryera nga NATO dhe Pju Risërç, të cilat tregojnë mbështetje të lartë publike për Aleancën dhe për bashkëpunimin në mes Evropës dhe Amerikës së Veriut.