Forca e Sigurisë së Kosovës(FSK) nuk mund të lëvizë në veri pa pëlqimin e Komandantit të KFOR-it.

Këtë e ka konfirmuar për arbresh.info një zyrtar i NATO-s.

“Sipas marrëveshjes së Brukselit të vitit 2013, FSK-ja nuk mund të lëvizë në pjesën veriore të Kosovës pa pëlqimin paraprak të Komandantit të KFOR-it”, ka thënë ky zyrtar në kushte anonimiteti.

Sipas tij, gjatë vizitës së fundit të kryeministrit të Kosovës, Albin Kurti, Sekretari i Përgjithshëm i NATO-s, Jens Stoltenberg theksoi se angazhimi i NATO-s për stabilitetin në të gjithë Ballkanin Perëndimor është i palëkundur.

“Ai përsëriti se misioni i udhëhequr nga NATO KFOR është përqendruar në zbatimin e përditshëm të mandatit të tij që rrjedh nga Rezoluta 1244 e Këshillit të Sigurimit të Kombeve të Bashkuara, domethënë për të siguruar një mjedis të sigurt dhe siguri në lirinë e lëvizjes për të gjitha komunitetet në Kosovë. Z. Stoltenberg theksoi gjithashtu mbështetjen e vazhdueshme të NATO-s për përpjekjet për të riaktivizuar bisedimet midis Beogradit dhe Prishtinës – përfshirë përmes procesit të lehtësuar nga BE – dhe theksoi se dialogu mbetet mënyra e vetme për të arritur një zgjidhje të qëndrueshme politike në Ballkanin Perëndimor”, deklaroi i ky burim për portalin arbresh.info.

Këto komente vijnë pasi kryeministri Kurti iu drejtua Prokurorisë së Shtetit në lidhje me marrëveshjen që Hashim Thaçi si ish-kryeministër pati bërë marrëveshje me ish-Sekretarin e Përgjithshëm të atëhershëm të NATO-s, Anders Fogh Rasmussen në vitin 2013 në lidhje me lëvizjen e FSK-së në veri të Kosovës.

“Unë nuk kam akuzuar Sekretarin e Përgjithshëm të NATO-së për shkëmbim të letrave dhe nuk mund të kërkojë llogari prej tij. E kam akuzuar titullarin e mëhershëm të institucioneve të Republikës së Kosovës që kam dhënë firmën në një shkresë të tillë. Një problem që i ka rrënjët 8 vite më parë nuk mund të adresohet e rregullohet me një takim të vetë. Atëherë çështjen e kam referuar në prokurori dhe i mbetet prokurorisë.

Marrëdhëniet në mes të Kosovës dhe NATO-së do të vazhdojnë që të thellohen”, deklaroi Kurti ditë më parë./arbresh.info/